काठमाडौं । प्रतिनिधिसभाको महिला तथा सामाजिक समितिले राष्ट्रिय दलित आयोग र आदिवासी जनजाति आयोगमा तत्काल अध्यक्षसहितका पदाधिकारी नियुक्त गर्न सरकारलाई निर्देशन दिएको छ ।

आज समितिले दुवै आयोगको हालसम्मको कार्यप्रगतिका सम्बन्धमा आयोगका सचिवलाई बोलाएर जानकारी लिएको थियो । छलफलपछि बैठकले अध्यक्ष र पदाधिकारी नहुँदा आयोगलाई नीतिगत निर्णय गर्न समस्या परेको भन्दै तत्काल नियुक्ति गर्न निर्देशन दिएको हो ।

त्यस्तै समितिले पदाधिकारी नभएकै कारण वार्षिक प्रतिवेदन तयार नगरिनु वाञ्छनीय नभएको भन्दै अनिवार्य रूपमा वार्षिक लगायतका प्रतिवेदन तयार गर्न पनि आदिवासी जनजाति आयोगलाई निर्देशन दिएको छ ।

त्यस्तै, समितिले राष्ट्रिय दलित आयोग एवं आदिवासी जनजाति आयोगलाई आफ्नो कार्यक्षेत्रमा स्पष्ट हुन पनि भनेको छ । दुवै आयोगको उद्देश्य आफ्नो समुदायको समग्र उत्थान भएको भन्दै सो कार्यका लागि समुदाय भित्र को, को पर्छन् भन्ने विषयमा टुंगोमा पुग्नुपर्ने समितिको ठहर छ ।