काठमाडौँ । नेपाली कांग्रेसका सांसद गगन थापाले सभामुखको पार्टी कुन हो भन्दै प्रश्न गर्नुभएको छ । संसद भवन नयाँ बानेश्वरमा सञ्चारकर्मीहरूसँग कुरा गर्दै थापाले अदालतको निर्णयले थप संवैधानिक जटिलता सिर्जना गरेको बताउनुभएको हो ।

’अदालतको फैसलापछि सभामुखलाई कुन पार्टीको मान्ने,’ थापाले प्रश्न गर्नुभयो, ’अदालतको फैसलाले थप जटिलता सिर्जना गरेको छ । यी जटिलताहरू फर्की फर्की अदालतकै ढोकामा जाने हो ।’

हिजोसम्म नेकपाको विवाद टुंगो नलागेसम्म कांग्रेस चुप लाग्ने नीति रहेको तर अदालतको फैसलापछि कांग्रेसले छिटै नयाँ धारणा सार्वजनिक गर्ने उहाँले बताउनुभयो । यसअघि आज संसद बैठक सुरु हुनसाथ प्रचण्ड–माधव समूहका नेता भीम रावलले प्रधानमन्त्री केपी ओलीको पार्टी कुन हो भन्दै प्रश्न गर्नुभएको थियो ।