काठमाडौँ । प्रधानमन्त्री केपी शर्मा ओलीले आफूलाई प्रधानमन्त्रीबाट हटाउन खोज्नेलाई ठेगान लगाइदिने चेतावनी दिनुभएको छ । नेकपाको प्रचण्ड–माधव समूहले नैतिकता छ भने राजीनामा दिन दबाब दिइरहेका बेला प्रधानमन्त्री ओलीले राजीनामा नदिने र अन्य प्रक्रियाबाट हटाउन खोजे ठेगान लगाइदिने चेतावनी दिनुभएको हो ।

नेपाली कांग्रेससँग मिलेर नेकपा दाहाल नेपाल समूहले प्रधानमन्त्रीविरुद्ध अविश्वासको प्रस्ताव दर्ता गर्ने कसरत तीव्र पारेको छ । तर त्यसअघि नै राजीनामा दिएर नैतिकता प्रदर्शन गर्न ओलीलाई अन्तिम मौका आफूहरुले अझै पनि दिएको दाहाल–नेपाल समूहका अध्यक्ष माधवकुमार नेपालले बताउनुभयो ।

केपी ओलीले फुर्ती लगाउने दिन अब सकिएको बताउँदै उहाँले नैतिकताको सानो अंश मात्रै पनि बाँकी भए राजीनामा दिन सुझाव दिनुभयो। तर प्रधानमन्त्री ओलीले राजीनामा नदिने र आफैले संसदमा विश्वासको मत पनि नलिने रणनीति तय गर्नुभएको छ ।

विधि पद्धति अनुसार अविश्वासको प्रस्ताव आए सामना गर्ने ओलीको तयारी छ । आज आफ्नो समूहको संसदीय दलको बैठकमा ओलीले आफूहरुसँग बहुमत रहेकोले आत्तिन पर्ने अवस्था नरहेको बताएको प्रधानमन्त्री निकट सांसदहरुले बताएका छन् ।

बैठकमा आज ११५ जना सांसदहरु सहभागी भएको र यो संख्या बढ्दै जाने भएकोले आफूहरु ढुक्क अवस्थामा रहेको ओलीले बताउनुभएको ती सांसदको भनाइ छ ।

संसदमा अविश्वासको प्रस्ताव आयो भने डटेर सामना गर्ने र जित आफूहरुकै हुने ओलीले बताउनुभएको थियो । संसदीय दलको बैठकपछि काठमाडौँमा आयोजित एक कार्यक्रममा पनि प्रधानमन्त्री ओलीले आफूलाई हटाउन खोज्नेलाई ठेगान लगाइदिने चेतावनी दिनुभयो ।

प्रधानमन्त्री ओलीको सिफारिसमा भएको संसद विघटनलाई सर्वोच्च अदालतले बदर गरेपछि पुनस्र्थापित प्रतिनिधिसभाको बैठक भोलि बोलाइएको छ । भोलिको बैठकमै प्रधानमन्त्री ओलीविरुद्ध अविश्वासको प्रस्ताव दर्ता गर्ने कसरतमा दाहाल–नेपाल समूह लागेको छ ।

यो समूहले कांग्रेस सभापति शेरबहादुर देउवालाई भावी प्रधानमन्त्रीका रुपमा अघि सार्ने चर्चा छ । तर देउवाले भने अहिले आफू प्रधानमन्त्रीको दौडमा नरहेको बताएर राजनीतिलाई थप अनिश्चयमा पार्नुभएको छ । नेकपाको झगडामा आफूले फस्न नचाहेको बताउँदै देउवाले प्रधानमन्त्रीको दौडमा नरहेको स्पष्ट पार्नुभयो ।

नेकपा कानूनी रुपमा एक रहँदासम्म प्रचण्ड–माधव समूहले प्रधानमन्त्री ओलीविरुद्ध संसदमा अविश्वासको प्रस्ताव ल्याउनै नसक्ने ओली समूहका नेताहरुको दाबी छ । तर नेकपा संसदीय दलको विधानअनुसार दलको नेताविरुद्ध अविश्वासको प्रस्ताव आएमा भने त्यसको सामना गर्न प्रधानमन्त्री ओली तयार रहेको उनीहरुले बताएका छन् ।