काठमाडौं । प्रधानमन्त्री तथा ओली समूहका संसदीय दलका नेता केपी शर्मा ओलीले संसदका गतिविधिमा सक्रियतापूर्वक केन्द्रित हुन सांसदहरूलाई निर्देशन दिनुभएको छ ।

आज प्रधानमन्त्री निवास बालुवाटारमा बसेको ओली समूहको संसदीय दलको बैठकमा प्रधानमन्त्री ओलीले संसदमा दृढताका साथ अगाडि बढ्न निर्देशन दिएको राष्ट्रिय सभाका प्रमुख सचेतक खिमलाल भट्टराईले बताउनुभयो ।

भट्टराईले अविश्वास प्रस्ताव ल्याउन कसैले हिम्मत समेत नगर्ने बताउनुभयो । ‘अविश्वासको प्रस्ताव ल्याउन कसैले हिम्मत गर्दैनन् । जो बाहिर हुनुहुन्छ, उहाँहरू पनि फर्कनुहुन्छ । नेकपा विभाजन हुन कठिन छ,’उहाँले भन्नुभयो ।

बैठकमा ११५ सांसद उपस्थित भएको ओली समूहको दाबी छ । यद्यपि बालुवाटारभित्र कुनै पत्रकारलाई छिर्न दिइएको थिएन ।
बैठकमा वामदेव गौतम, लालबाबु पण्डित र तुलसा थापा उपस्थित थिएनन् ।

गत पुस ५ गते प्रधानमन्त्री केपी शर्मा ओलीले संसद विघटन गरेपछि नेकपा दुई समूहमा बाँडिएको छ । प्रचण्ड–नेपाल समूहले शुक्रबार संसदीय दलको बैठक गरेको थियो ।

उक्त बैठकले प्रचण्डलाई संसदीय दलको नेता चयन गरेको छ । सो समूहले आफ्ना पक्षमा १ सय ११ सांसद रहेको दाबी गरेको छ । भोली संसद बैठक बस्दैछ ।