काठमाडौं । मष्तिष्कघातपछि नर्भिक अस्पतालमा उपचाररत नेपाली कांग्रेसका नेता नवीन्द्रराज जोशीको स्वास्थ्य अवस्थामा लगातार सुधार भइरहेको अस्पतालले जनाएको छ ।

आज अपरान्ह अस्पतालले दिएको जानकारी अनुसार जोशीको स्वास्थ्यमा उल्लेख्य सुधार भएको हो । नेता जोशीको अवस्थामा सुधार भएपछि हिजो बिहानबाट भेन्टिलेटरको फूल सपोर्ट हटाई भेन्टिलेटरको सपोर्ट लगातार कम गर्न थालिएको उपचारमा संलग्न न्यूरो सर्जन डा. राजीव झाले जानकारी दिनुभएको छ ।

‘सोमबार बिहानदेखि उहाँले आफैंले सास फेरिरहनुभएको छ । मेसिनले सास फेराउनु परेको छैन’, डा. झाले भन्नुभयो ।

बेहोस् अवस्थामा भेन्टिलेटरमा रहेको बिरामीलाई श्वासप्रश्वासमा सहजता होस् भनेर भोली बिहान नेता जोशीको घाँटीमा सानो प्वाल पार्ने सर्जरी गरिने डा. झाले बताउनुभयो ।

बिहीबार राति मस्तिष्काघात भएपछि अस्पताल भर्ना भएका नेता जोशीको शुक्रबार शल्यक्रिया गरिएको हो ।