काठमाडौं । प्रधानमन्त्री केपी शर्मा ओली आज गृह जिल्ला झापा जादैँ हुनुहुन्छ ।

औद्योगिक क्षेत्र शिलान्यासलगायतका कार्यक्रममा सहभागी हुन प्रधानमन्त्री ओली झापा जान लाग्नुभएको हो । प्रधानमन्त्री ओलीले झापास्थित निर्वाचन क्षेत्र–५ मा बन्न लागेको नेपाल–चीन मैत्री पार्क शिलान्यास गर्ने कार्यक्रम रहेको छ ।

६४ अर्ब लगानी रहने ‘चीन–नेपाल मैत्री औद्योगिक पार्क’ पीपीपी मोडलमा निर्माण गर्ने सम्झौता भइसकेको छ । २ हजार २ सय विघा क्षेत्रमा निर्माण हुन लागेको औद्योगीक पार्क नेपालकै नमुना हुने दाबी गरिएको छ ।

प्रधानमन्त्री ओलीले आजै औद्योगीक र्पाकमा आयोजित सभालाई सम्बोधन गर्ने कार्यक्रम छ । यसैगरी, प्रधानमन्त्री ओलीले आजै दमक र इलामको चुलाचुलीमा पर्ने रतुवा खोलामा निर्माण भएको पुलको उद्घाटन गर्ने कार्यक्रम पनि तय भएको छ ।

यसअघि, सरकारले एक सातामा पाँच वटा औद्योगिक क्षेत्र शिलान्यास कार्यक्रम निर्धारण गरेको थियो ।

सो कार्यक्रमअनुसार कञ्चनपुरको दैजीछेला औद्योगिक क्षेत्र, बाँकेको नौबस्ता औद्योगिक क्षेत्र, रुपन्देहीको मोतीपुर औद्योगिक क्षेत्र र मकवानपुरको मोतीपुर औद्योगिक क्षेत्र शिलान्यास भइसकेका छन् ।

यस्तै, प्रधानमन्त्री ओली पुनः फागुन १८ गते मंगलबार व्यवसायी दुर्गा प्रसाईँले सञ्चालन गरेको पूर्वाञ्चल क्यान्सर अस्पतालको उद्घाटन गर्न र २१ गते सुखानी शहीद स्मृति दिवसका अवसरमा बिर्तामोडमा हुने सभालाई सम्बोधन गर्न झापा जानुहुने तय भएको नेकपा झापाका कार्यालय सचिव शिव ढुंगेलले जानकारी दिनुभएको छ ।