काठमाडौं । नेपाली काँग्रेसका प्रवक्ता विश्वप्रकाश शर्माले मुलुकको राजनीतिक परिवर्तनमा युवा पुस्ताले मुख्य भूमिका खेल्नुपर्ने विचार व्यक्त गर्नुभएको छ । त्यसका लागि युवामा समेत सकारात्मक सोचको विकास हुनुपर्ने उहाँले बताउनुभयो ।

करियर प्याइन्टद्वारा राजधानीमा आयोजित शैक्षिक मेलालाई सम्वोधन गर्दै प्रवक्ता शर्माले असल बनेर मुलुकै सेवामा जुट्न विद्यार्थी वर्गलाई आग्रह गर्नुभयो । परिवार तथा समाजको सपनालाई पूरा गर्ने गरी विद्यार्थी अघि बढ्नुपर्ने आवश्यकता उहाँले औल्याउनुभयो ।

कार्यक्रममा नेपाल विद्युत् प्राधिकरणका पूर्वकार्यकारी निर्देशक कुलमान घिसिङले नेतृत्वमा विश्वासको संकट भएको अवस्थामा कुनै पनि संस्था सहज हिसावले अघि बढ्न नसक्ने बताउनुभयो ।

कडा रुपमा मिहिनेत गर्न, समस्यासित जुधदै अघि बढ्ने वानीको विकास विद्यार्थीमा बढाउनुपर्ने आवश्यकता उहाँले औल्याउनुभयो ।

कार्यक्रममा विद्यार्थीलाई विदेशमा होइन स्वेदशमा नै उच्च शिक्षा हासिल गर्न र स्वदेशमै समृद्धिको अभियानमा जुट्न आह्वान गरिएको थियो ।