काठमाडौं । नेकपाको प्रचण्ड माधव पक्षका बरिष्ठ नेता तथा पुर्व प्रधानमन्त्री झलनाथ खनालले आफु प्रधानमन्त्री बन्न तयार रहेको बताउनु भएको छ ।

नेपाली रेडियो नेटवर्कको नेपाली बहसमा पत्रकार ऋषि धमलासँग कुराकानी गर्दै उहाँले पार्टीको दिएको जुनसुकै जिम्मेबारी लिन आफु तयार रहेको बताउनु भएको हो ।

पार्टीले प्रधानमन्त्रीका लागि प्रस्ताव गरेपनि राष्ट्रपतिका लागि प्रस्ताव गरेपनि जिम्मेबारी लिन तयार रहेको तर पदको पछि भने नलाग्ने उहाँले स्पष्ट पार्नुभयो ।

दुवै भूमिकाका लागि आफु योग्य र सक्षम रहेको संकेत गर्दै उहाँले नयाँ राजनीति प्रक्रियाका बारेमा पार्टी भित्र चाडै नै छलफल हुने जानकारी दिनुभयो ।

पूर्व प्रधानमन्त्री खनालले नेपालको राजनीतिक गन्तव्य तय गर्ने जिम्मेबारी हिजोसम्म सर्वोच्च अदालतमा रहेकोमा अव संसदमा गएको उल्लेख गर्नुभयो ।

उहाँले संसदबाट नयाँ सरकार बनाउने प्रक्रिया अगाडि बढ्ने बताउदै काँग्रेसलाई नयाँ सरकारको नेतृत्व दिने बारेमा आफुहरु खुल्ला रहेको स्पष्ट पार्नुभयो ।

आगामी राजनीतिक यात्रा राष्ट्रिय सहमतीका साथ अगाडि बढाउनु पर्ने पक्षमा आफुहरु रहेको उल्लेख गर्दै पूर्व प्रधानमन्त्री खनालले सहमतीमै नयाँ सरकारको खाका बन्ने विश्वास व्यक्त गर्नुभयो ।

उहाँले प्रधानमन्त्री केपी शर्मा ओलीसँग तत्काल सहमती र सहकार्यको संभावना नरहेको स्पष्ट पार्दै उहाँसँग रहेका धेरै नेताहरुलाई आफुहरुले समेट्ने दावी गर्नुभयो ।