काठमाडौँ । पूर्वप्रधानमन्त्री बाबुराम भट्टराईले उपचारका लागि भारत जानु परेकोमा आफू लज्जित र दुखित रहेको सामाजिक सञ्जालमार्फत बताउनुभएको छ ।

भट्टराई आज बिहान उपचारका लागि भारतको नयाँ दिल्ली प्रस्थान गर्नुभएको थियो । नेपाली दूतावासको अतिथि कक्षमा बसेर घोत्लिदै गर्दा आफू लज्जित र दुखित भएको उहाँले बताउनुुभएको छ ।

‘२१ औं शताब्दीमा शरीरको कुनामा पलाएको ट्युमर सामान्य कि घातक हो छुट्याउन नसकेर विदेशमा छु ! सामान्य नागरिकको के होला ?’ उहाँले ट्वीटरमा लेख्नुभएको छ । साथै, उहाँले आफ्नो स्वास्थ्यलाभको कामना गर्नेहरुलाई धन्यवाद दिनुभएको छ ।

पेटमा समस्या देखिएपछि थप उपचारका लागि उहाँ नेपाल वायुसेवा निगमको जहाजबाट नयाँ दिल्ली जानुभएको भट्टराईका प्रेस सल्लाहकार विश्वदीप पाण्डेले जानकारी दिनुभएको छ । पाण्डेका अनुसार नेता भट्टराईलाई न्युरो–इन्डोक्राइनको ट्युमर भएको आशंका गरिएको छ ।