काठमाडौं । नेपाली कांग्रेसका वरिष्ठ नेता रामचन्द्र पौडेलले पैसाकै कारणले आन्दोलन नरोकिने बताउनुभएको छ । नेपाल प्रेस युनयन, सुनसरीले आज इटहरीमा गरेको साक्षात्कार कार्यक्रममा बोल्दै उहाँले पैसाको कारण प्रधानमन्त्री केपी शर्मा ओलीको असंवैधानिक कदमविरुद्धको आन्दोलन नरोकिने बताउनुभएको हो ।

पार्टी सभापति देउवाले नेपाल मगर संघ गण्डकी प्रदेशको सम्मेलनलाई सम्बोधन गर्दै बिहीबार आन्दोलन गर्नका लागि कांग्रेससँग पैसा नभएको बताउनुभएको थियो ।

त्यसको जवाफमा आज पौडेलले आन्दोलन पैसाले होइन विचारले हुने भन्दै सभापति देउवाको आलोचना गर्नुभयो । उहाँले प्रधानमन्त्री ओलीको पनि आलोचना गर्नुभयो । देउवाकै कारणले प्रधानमन्त्री ओलीलाई अधिनायकवादी बन्न फाइदा पुगेको आरोपसमेत पौडेलले लगाउनुभयो ।

सभापति देउवाले आफ्ना कुरा नसुन्दा कांग्रेस कमजोर बनेको पौडेको भनाइ छ । उहाँले प्रदेश सरकारविरुद्ध प्रचण्ड–माधव समूहले दर्ता गराएको अविश्वास प्रस्तावमा साथ दिनुपर्ने आफ्नो प्रस्ताव पनि देउवाले नसुनेको बताउनुभयो ।