२०८३, कार्तिक २० गते
- यो साता चर्चामा :
काठमाडौं । प्रदेश १ को प्रदेशसभा बैठक बसेको तीन मिनेटमै अनिश्चितकालका लागि स्थगित भएको छ । आज विराटनगरस्थित प्रदेश सभा हलमा सुरु भएको सातौँ अधिवेशको पहिलो बैठक अनिश्चितकालका लागि स्थगित भएको हो ।
बैठकमा सभामुख प्रदिपकुमार भण्डारीले प्रदेश प्रमुखबाट आएको हिउँदे अधिवेशन आह्वान भएको पत्र पढेर सुनाउँदै बैठक स्थगित गर्नुभएको हो । प्रदेश सभा हुनसक्ने अप्रिय घटनालाई रोक्नका लागि प्रदेश सभा बैठक अनिश्चितकालका लागि स्थगित गरिएको हो ।
नेकपा विभाजज भएपछि त्यसको असर प्रदेश सरकारमा पनि परेको छ । प्रदेश १ मा मुख्यमन्त्री शेरधन राईविरुद्ध अविश्वासको प्रस्ताव दर्ता गरिएको छ । नेकपा विभाजनपछि एकले अर्को पक्षका सांसदलाई निलम्बन गर्दै आएका थिए ।
कुनै पनि अप्रिय घटना नहोस् भन्नका लागि प्रदेश सभा परिसरमा मर्यादापालकको संख्या समेत बढाइएको थियो । यस्तै सांसदहरु बस्ने कुर्सीसमेत वेल्डिङ गरिएको थियो । यसअघि विभिन्न प्रदेश र प्रतिनिधि सभामा पनि सांसदहरुले कुर्सी उठाएर हानेको घटनाबाट पाठ सिक्दै वेल्डिङ गरिएको प्रदेशसभा सचिवाललयले जानकारी दिएको छ ।
यता, प्रधानमन्त्री केपी ओली समूहले केन्द्रीय सदस्यमा मनोनित गरेको बामगती प्रदेश सभा सदस्य रमा आले मगरले आफ्नो समर्थन प्रचण्ड–माधव समूहलाई नै रहेको बताउनुभएको छ । नेकपा विभाजनपछि आलेलाई ओली समूहले केन्द्रीय सदस्यमा मनोनित गरेको थियो ।
तर, उक्त पद अस्वीकार गरेको उहाँले बताउनुभयो । आफ्ना बारेमा अनेक हल्ला चलाइएको बताउँदै उहाँले आफ्नो समर्थन अष्टलक्ष्मी शाक्यलाई नै रहेको बताउनुभयो । आले काठमाडौं–१० (ख) बाट प्रदेससभा सदस्यमा निर्वाचित हुनुभएको हो ।
उहाँले मुख्यमन्त्री डोरमणि पौडेल विरुद्धको अविश्वास प्रस्तावमा हस्ताक्षर समेत गर्नुभएको छ । बागमती प्रदेशसभा बैठक आजबाट शुरु हुँदैछ ।
नेकपा विभाजित भएपछि ओली समूहका मुख्यमन्त्री पौडेल विरुद्ध प्रचण्ड–माधव समूहका ४५ जनाले अविश्वासको प्रस्ताव दर्ता गराएका छन् । अविश्वासको प्रस्ताव दर्ता गराउँदै शाक्यलाई मुख्यमन्त्री बनाउन प्रस्ताव गरिएको छ ।
