काठमाडौं । नेकपाको प्रचण्ड–माधव समुहले वैशाखमा निर्वाचन हुने गरी निर्वाचन गतिविधि अघि नबढाउन आयोगलाई आग्रह गरेका छन् । 

आज अध्यक्षद्वय पुष्पकमल दाहाल‘प्रचण्ड’ र माधवकुमार नेपाल निर्वाचन आयोग नै पुगेर संसद विघटनविरुद्धको मुद्धा सर्वोच्च अदालतमा विचाराधीन रहेकाले तत्काल निर्वाचन गतिविधि अघि नबढाउन माग गरेका हुन् ।

प्रधानमन्त्री केपी ओलीले संसद विघटन गरी वैशाख १७ र २७ गते प्रतिनिधि सभा निर्वाचन घोषणा गरेपछि आयोगले तयारी अघि बढाएको बताउँदै आएको छ ।

तर, प्रतिनिधि सभा विघटनसम्बन्धी मुद्दा सर्वोच्चमा विचाराधीन अवस्थामा रहेका बेला तत्काल निर्वाचनसम्बन्धी कार्यक्रम नगर्न आयोगलाई आग्रह गरिएको स्थायी कमिटी सदस्य लिलामणि पोखरेलले बताउनुभयो ।

जवाफमा निर्वाचन आयोगले स्थायी मतदानस्थलको व्यवस्थापन लगायतका कार्यक्रमबाहेक अरु केही नगरिएको बताएको नेता पोखरेलले बताउनुभयो ।

राजनीतिक रुपमा आम सहमति भई नसकेकाले अरु निर्वाचनसम्बन्धी कार्यक्रममा अगाडि नबढेको निर्वाचन आयोगले जनाएको छ । पार्टीको पत्र लिएर प्रचण्ड–नेपालसहित लिलामणि पोखरेल, राजेन्द्र पाण्डे, रामनारायण बिँडारी, कृष्णभक्त पोखरेललगायत नेता निर्वाचन आयोग पुगेका थिए ।