काठमाडौं । परराष्ट्रमन्त्री प्रदीप ज्ञवाली माघ १ गते छिमेकी देश भारतको भ्रमणमा जाने हुनुभएको छ । प्रधानमन्त्री केपी शर्मा ओलीले आज धनगढीमा आयोजित आमसभा परराष्ट्रमन्त्री ज्ञवालीको भारत भ्रमणका जान लागेको जानकारी दिनुभएको हो ।

सभालाई सम्बोधन गर्दै प्रधानमन्त्री ओलीले अब सीमा नाकाको अवस्था सुधार हुने बताउनुभयो ।

‘१४ तारिखमा हाम्रो परराष्ट्रमन्त्री भारत जाँदै हुनुहुन्छ । त्यतिबेला यसको बारे कुरा हुनेछ,’ सुदूरपश्चिम प्रदेशको विकास र सीमा समस्याबारे कुरा गर्दै उहाँले भन्नुभयो ।
लिम्पियाधुरा, कालापानी र लिपुलेकको विषयमा विवाद भएपछि पहिलोपल्ट नेपालका परराष्ट्र मन्त्री भारत जान लाग्नुभएको हो ।

केही समयदेखि काठमाडौं र नयाँदिल्लीमा परराष्ट्रमन्त्री ज्ञवालीको भ्रमणबारे तयारी भइरहे पनि दुवै देशले औपचारिक रूपमा यसको जानकारी दिएका भने छैनन् । यसैबीच, आज प्रधानमन्त्रीले उक्त खुलासा गर्नुभउको हो ।

प्रतिनिधि सभा विघटनपछि प्रधानमन्त्री ओली आज पहिलोपटक राजधानी बाहिरको कार्यक्रममा सहभागी हुँदै हुनुहुन्छ ।

नेकपा ओली समूहले कैलालीको धनगढीमा आयोजना गरेको आमसभामा सहभागी हुन ओली आजै धनगढी पुग्नुभएको हो ।

प्रधानमन्त्री ओलीले धनगढीको खुलामञ्चमा आज दिउँसो आयोजना हुने सभालाई ओलीले सम्बोधन गर्ने कार्यक्रम छ ।

प्रधानमन्त्रीको आगमनका कारण धनगढीमा सुरक्षा व्यवस्था कडा पारिएको छ । विमानस्थलमा तालिम प्राप्त कुकुरसहित सेना परिचालन गरिएको छ भने धनगढीका चोक चोकमा बाक्लो संख्यामा नेपाल प्रहरी र सशस्त्र प्रहरी खटाइएको छ । ओलीको धनगढी यात्राका क्रममा तनाव हुनसक्ने अनुमान गरेर सुरक्षा व्यवस्था कडा पारिएको छ ।

यद्यपि, प्रधानमन्त्री ओली धनगढी नपुग्दै नेकपा प्रचण्ड–माधव समूहका कार्यकर्ताले उहाँविरुद्ध धनगढीमा विरोध प्रदर्शन गरेका थिए ।

प्रधानमन्त्री ओलीको सम्बोधन लागि मञ्च बनाइएको खुलामञ्चनजिक अनेरास्ववियूका कार्यकर्ताले आज बिहान टायर बालेका हुन् । प्रधानमन्त्री ओलीलाई ६ ठाउँमा कालोझन्डा देखाउने कार्यक्रम रहेको बताइएको छ ।

सूदुरपश्चिमका मुख्यमन्त्री त्रिलोचन भट्ट भने प्रधानमन्त्रीलाई स्वागत गर्न विमानस्थल जानुभएन । उहाँ प्रचण्ड–माधव भएकाले नजानुभएको हो । आफूलाई प्रधानमन्त्रीको आगमनबारे थाहा नभएको उहाँले बताउनुभएको छ ।