काठमाडौं । नेकपाको पुष्पकमल दाहाल प्रचण्ड र माधवकुमार नेपाल समूहको स्थायी कमिटी बैठक जारी छ । बैठक पार्टी कार्यालय कोटेश्वर पेरिसडाँडामा बसिरहेको छ ।

पत्नी सीता दाहालको उपचार गर्न मुम्बई गएपछि प्रचण्ड भने बैठकमा सहभागी हुनुभएको छैन । बैठकको अध्यक्षता अर्का अध्यक्ष नेपालले गरिरहनुभएको छ ।

प्रचण्डले आइतबारको बैठकमा नै पत्नी दाहालको थप उपचारका लागि मुम्बई जानुपर्ने भएकाले आजको बैठकमा उपस्थित हुन नसक्ने जानकारी गराउनुभएको थियो ।

सरकारको कदमविरुद्ध शनिबार दोस्रो चरणका संघर्षका कार्यक्रम घोषणा गरेको यो समूहले हिजोको बैठकबाट अध्यक्ष नेपालको संयोजकत्वमा पार्टी एकताका बाँकी काम पूरा गर्न र विभिन्न तहमा पदाधिकारी चयन गर्नका लागि दश सदस्यीय कार्यदल गठन गरेको छ ।

संघर्षका कार्यक्रम र कार्यदलको कार्यविभाजनका सन्दर्भमा छलफल गरेर आजको बैठकले अन्तिम रुप दिने भएको छ । कार्यदललाई एक साताको समयसीमा दिइएको छ ।