काठमाडौं । सत्तारुढ नेकपा मिलाउने अन्तिम प्रयासका लागि नेपालको चारदिने भ्रमणमा रहेको चिनियाँ उच्चस्तरीय टोली फर्किएको छ । नेकपा विभाजन भएपछि फेरि एक बनाउन चिनियाँ राष्ट्रपति सिजिन पिङको सन्देश बोकेर आएको टोली आज चीन फर्किएको हो । राष्ट्रपति सिको सन्देश बोकेर चिनियाँ कम्युनिष्ट पार्टीका अन्तर्राष्ट्रिय बिभाग उपमन्त्री गुओ येझाउ नेतृत्वको टोली आइतबार काठमाडौं आएको थियो । 

चिनियाँ विशेष टोलीले राजनीतिक अस्थिरता रोक्न, विभाजित नेकपालाई मिलेर अघि बढ्न र यहाँको राजनीतिक वातावरणले चीनमा पर्न सक्ने सुरक्षा खतराबारे सजग रहन आग्रहसहितका तीनवटा सन्देश सत्तारूढ र विपक्षी दलका नेताहरूलाई दिएको छ ।टोलीले नेपालमा विकसित राजनीतिक परिस्थितिबारे चिन्ता र चासो प्रकट गरेको थियो ।

चिनियाँ कम्युनिस्ट पार्टी स्थापनाको सय वर्ष पुगेको अवसरमा यहाँका राजनीतिक दलहरूसँग सम्बन्ध मजबुत बनाउन भ्रमण गरेको भनिए पनि शीर्ष नेतासँगका सबै भेटमा चिनियाँ अधिकारीहरूले नेपालमा विकसित राजनीतिक अस्थिरता र नेकपामा आएको फुटबारे जिज्ञासा राखेको थियो ।

काठमाडौं उत्रेलगत्तै राष्ट्रपति विद्यादेवी भण्डारी, प्रधानमन्त्री केपी शर्मा ओलीसँग भेटवार्ता गरेका उनीहरूले त्यसपछि नेकपा पुष्पकमल दाहाल प्रचण्ड र माधवकुमार नेपाल, वरिष्ठ नेता झलनाथ खनाल, सभामुख अग्नि सापकोटा र जनता समाजवादी पार्टीका संघीय परिषद् अध्यक्ष बाबुराम भट्टराईलाई भेटेका थिए । हिजो कांग्रेस सभापति शेरबहादुर देउवासँग भेटेपछि चिनियाँ टोली आज फर्किएको हो ।