काठमाडौं । प्रधानमन्त्री केपी शर्मा ओलीले गत आइतबार संसद् (प्रतिनिधि सभा) भंग गरेपछि भारतीय पक्षबाट पनि विभिन्न प्रतिक्रिया आएका छन् । प्रतिक्रिया दिनेमा पूर्वराजदूतदेखि लिएर पूर्वजर्नेलसम्म छन् । नेपालको संसद् भंग हुनु भारतीय पक्षको सफलताको रुपमा व्याख्या हुन थालेका छन् ।

पछिल्लो राजनीतिक अवस्थाले नेपालमा चीनको प्रभाव घटेको र भारतलाई फाइदा पुगेको उनीहरुको निष्कर्ष छ ।

यसैबीच, नेपालका लागि पूर्वभारतीय राजदूत रणजित रायले इकोनोमिक टाइम्समा एउटा लेख लेखेका छन् । त्यहाँ प्रकाशित लेखमा पूर्वराजदूत रायले चीनले सत्तारुढ नेपाल कम्युनिस्ट पार्टी (नेकपा) मिलाउने खोजेको तर त्यो प्रयास असफल भएको निष्कर्ष निकालेका छन् ।

‘चीनले प्रधानमन्त्री केपी शर्मा ओलीलाई सहयोग गरिरहेको वेलासम्म सबै ठीक थियो । तर, चीनले ओलीको नेतृत्वको निरन्तरतामा भन्दा नेकपा एक रहने विषयमा बढी चासो दिएको महसुस भएपछि ओलीको रणनीति बदलिएको हो’ राजदूत रायले लेखेका छन्, ‘त्यसपछि ओलीले भारतसँग सम्पर्क बढाएका हुन् ।’