काठमाडौं । नेपाल कम्युनिष्ट पार्टी (नेकपा)को पुष्पकमल दाहाल प्रचण्ड र माधवकुमार नेपाल पक्षधरको केन्द्रीय कमिटी बैठकले प्रधानमन्त्री केपी शर्मा ओलीमाथि अनुशासनको कारबाही गर्ने विषय पनि कार्यसूचीमा पारेको छ ।

बैठकले स्थायी समितिको पुस ५ गतेको निर्णयलाई अनुमोदन गर्ने र रिक्त रहेको अध्यक्ष पदमा पदपूर्ति गर्ने पनि कार्यसूचीमा उल्लेख छ ।

स्थायी समिति सदस्यमा कृष्णबहादुर महरालाई अनुमोदन गर्ने र संसद विघटनको विरोधका कार्यक्रमहरु तय गर्ने पनि केन्द्रीय कमिटीको कार्यसूचीमा उल्लेख छ ।

बबरमहलस्थित कार्की ब्याङ्क्वेटमा बसेको बैठकमा ३१० जना केन्द्रीय सदस्य उपस्थित भएका नेताहरूले दावी गरेका छन् ।

बैठकमा वरिष्ठ नेता नेपालले अब एमाले ब्युँतिन नसक्ने र चुनाव चिह्नमा आफ्नो पनि हक रहने बताउनुभएको छ । प्रधानमन्त्री ओलीले एमाले ब्युँताउने हल्ला चलिरहँदा उहाँले त्यसको प्रतिक्रिया दिनुभएको हो ।