काठमाडौं । सत्तारुढ नेपाल कम्युनिष्ट पार्टी (नेकपा)को स्थायी कमिटी बैठकअघि अध्यक्ष तथा प्रधानमन्त्री केपी ओली र कार्यकारी अध्यक्ष पुष्पकमल दाहाल ‘प्रचण्ड’बीच भेटवार्ता भएको छ ।

दुई अध्यक्षबीच बालुवाटारमा ‘वान टु वान’ संवाद चलिरहेको ओलीनिकट स्रोतले जनाएको छ ।

बिहान ८ बजे स्थायी कमिटी सदस्य शंकर पोखरेलसँग भेट गरेपछि प्रचण्ड ओली भेट्न बालुवाटार पुग्नुभएको हो ।

मंगलबार सरकारले संवैधानिक परिषद्को नियुक्तिसम्बन्धी अध्यादेश जारी गरेपछि प्रचण्डले त्यसको आलोचना गर्दै पार्टीमा परामर्श नै नगरी अध्यादेश ल्याएको फिर्ता गर्नुपर्ने बताउनुभएको थियो ।

नेकपाको स्थायी कमिटी बैठक आज १ बजे बस्दैछ ।

विवादका चाङ्गबीच स्थायी कमिटी बैठक बस्न लागेको हो । बैठकमा ओलीले मंगलबार ल्याएको विवादित संवैधानिक परिषद्सम्बन्धी अध्यादेश छलफलको प्रमुख विषय बन्ने नेकपा स्रोतले जनाएको छ ।

यसैबीच, ओली र प्रचण्डबीचको वार्ता सकिएको छ । अब केहीबेरपछि स्थायी कमिटीको बैठक बस्दैछ ।