काठमाडौं । नेपाली कांग्रेसका महामन्त्री डा. शशांक कोइरालाले देशमा अब राजतन्त्र फर्केर आउने सम्भावना नरहेको बताउनुभएको छ । विराटनगरस्थित कोइरालानिवासमा आज आयोजित पत्रकार सम्मेलनमा उहाँले राजावादीहरुको आन्दोलनप्रति लक्षित गर्दै यस्तो बताउनुभएको हो ।

महामन्त्री डा. कोइरालाले बरु हिन्दूराष्ट्र स्थापना गर्नुपर्नेमा भने जोड दिनुभयो । जनमत संग्रहमार्फत हिन्दूराष्ट्र हुनुपर्ने उहाँले स्पस्ट पार्नुभयो ।

‘अबको चुनावपछि कांग्रेसको सरकार बन्छ । त्यसपछि राजनीतिक स्थिरता आउँछ’, उहाँले भन्नुभयो, ‘त्यसपछि जनमत संग्रहमार्फत हिन्दु राष्ट्र स्थापना गराउनुपर्छ । तर मुलुकमा राजा कुनै पनि स्वरूपमा आउँदैन ।’

अहिले प्रमुख प्रतिपक्षी नेपाली कांग्रेस सरकारविरुद्धको देशव्यापी आन्दोलनमा छ । यसैक्रममा महामन्त्री डा. कोइराला विराटनगर पुग्नुभएको हो ।