काठमाडौं । प्रतिनिधिसभा निर्वाचन आउन अव मात्र ८ दिन बाँकी छ । निर्वाचन आयोगले आवश्यक सबै तयारी अन्तिम चरणमा पुगेको जनाएको छ ।निर्वाचनलाई स्वच्छ, निष्पक्ष, स्वतन्त्र र सुरक्षित बनाउन सुरक्षा व्यवस्था बलियो बनाइएको छ । आयोगले देशभर तीन तहको सुरक्षा प्रबन्ध मिलाइएको जनाएको छ । नेपाल प्रहरी, सशस्त्र प्रहरी र नेपाली सेनाको सहकार्यमा मतदान केन्द्रदेखि मतपेटिका ढुवानीसम्म कडा सुरक्षा व्यवस्था गरिएको छ ।

फागुन २१ म हुने प्रतिनिधिसभा सदस्य निर्वाचनका लागि ७५ जिल्लामा निर्वाचन सामग्रीसहित मतपत्र पु¥याइएको छ । अहिले निर्वाचनको तयारी अन्तिम चरणमा पुगेको आयोगका सहायक प्रवक्ता सीता पुन श्रीसले जानकारी दिनुभएको छ ।

निर्वाचन आयोगले मतदातालाई ढुक्क र निडर भई आफ्नो मताधिकार प्रयोग गर्न आग्रह गरिरहेको छ । साथै, कुनै किसिमको डर, त्रास वा प्रलोभनमा नपरी स्वतन्त्र रूपमा मतदान गर्न आयोगले अनुरोध गरेको छ ।

निर्वाचनलाई प्रभावित पार्न सक्ने कुनै पनि गतिविधिलाई नियन्त्रण गर्न विशेष सुरक्षा सतर्कता अपनाइएको आयोगले जनाएको छ । संवेदनशील क्षेत्रहरूमा थप सुरक्षाकर्मी परिचालन गरिएको छ भने आकस्मिक परिस्थितिका लागि तत्काल प्रतिक्रिया टोली पनि तयारी अवस्थामा राखिएको आयोगले जानकारी दिएको छ ।

आयोग र उच्च स्तरीय निर्वाचन सुरक्षा समितिबीच निर्वाचनमा आउन सक्ने सुरक्षा चुनौती र त्यसको समाधानका विषयमा छलफल भएको छ । सुरक्षाकर्मीले सक्रिय रूपमा काम गरिरहेको ब्रिफिङ गरेको भन्दै आयोगले अव मतदाता थप ढुक्क हुने अवस्था सृजना भएको प्रवक्ता नारायणप्रसाद भट्टराई बताउनुहुन्छ ।

निर्वाचनका लागि सुरक्षा व्यवस्था बलियो रहेका, सबै राजनीतिक दलहरुले आफ्नो गतिविधि शान्तिपूर्ण ढंगबाट सञ्चालन गर्न र मतदाताले निर्भयपूर्वक मतदान गर्न अनुकूल वातावरण रहेको आयोगको भनाई छ ।

फागुन २१ मा हुने प्रतिनिधिसभा सदस्य निर्वाचन भन्दाअघि सीमा नाका सिल हुने भएका छन् ।मतदानअघि मादक पदार्थ बेचबिखनमा रोक लगाउनेदेखि होली पर्व र हिमाली जिल्लामा हिँउ परिरहेको र त्यसबाट निर्वाचनमा खटिने सुरक्षाकर्मी तथा कर्मचारीलाई लेक लाग्ने लगायतका निर्वाचनका चुनौती छन् ।

देश निर्वाचनमय भईरहेको छ । जनता फागुन २१ को व्यग्र प्रतिक्षामा छन् । मतदाता मत हाल्न उत्साहीत छन् । नेपाल सरकारका पूर्व सचिव द्वारीकानाथ ढुंगेलका अनुसार सरकारले चुनावका लागि गरेको सुरक्षा व्यवस्था राम्रो छ ।
यता, राजनितीक विश्लेषक प्राध्यापक डा खिला सापकोटा चुनावी सुरक्षा सहरमा राम्रो भए पनि अझै पनि गाँउगाँउमा सुरक्षा प्रवन्ध त्यति नपुगेको तर्क गर्नुहुन्छ । जनताले ढुक्कसंग मतदान गर्ने वातावरण मिलाउन उहाँको आग्रह छ ।

निर्वाचन हुदैन भन्ने अफवाह र शंका अझै पनि एक दुई राजनितिक व्यक्तित्वमा भएपनि हल्लाका पछाडि नलाग्न पूर्व सचिव ढुंगेल आग्रह गर्नुहुन्छ । चुनाव शान्तिपुर्ण रुपमा हुने उहाँको विश्वास छ ।

निर्वाचन आयोगले तोकिएकै मितिमा निर्वाचन हुनेमा ढुक्क रहन आग्रह गर्दै सुरक्षा व्यवस्था बलियो बनाइएको जनाएको छ । तीन तहको सुरक्षा प्रबन्ध मिलाइएको छ र मतदातालाई कुनै डर वा त्रास बिना ढुक्क भएर मतदान गर्न अनुरोध गरिएको छ । आयोगले सबै पक्षको सहकार्यमा शान्तिपूर्ण, निष्पक्ष र सुरक्षित निर्वाचन सम्पन्न गरिने विश्वास व्यक्त गरेको छ ।

अव, सरकारले ढुक्क भएर निर्वाचनमा भोट हाल्ने वातावरण बनाउन सुरक्षा व्यवस्था थप मजबुत बनाउनुपर्ने देखिन्छ ।सम्भावित जोखिम क्षेत्र पहिचान गरी त्यहाँ सुरक्षाकर्मीको उपस्थिति बढाउनुपर्ने, निष्पक्ष र शान्तिपूर्ण मतदानको प्रत्याभूति दिन कडाइका साथ कानुन कार्यान्वयन गर्नुपर्ने आवश्यकता छ ।

साथै, मतदातामा विश्वास जगाउन निर्वाचन आयोगसँग समन्वय गर्दै पारदर्शी सूचना प्रवाह, द्रुत गुनासो व्यवस्थापन र प्रभावकारी अनुगमन प्रणाली सञ्चालन गर्नु जरुरी छ । यिनै प्रयासबाट मात्रै नागरिकले ढुक्कका साथ मतदान प्रक्रियामा सहभागी हुने वातावरण निर्माण हुन सक्नेछ ।