काठमाडौं । आगामी फागुन २१ गतेका लागि तय भएको प्रतिनिधि सभा सदस्यको निर्वाचनको मिति आउन अब ६० दिन अर्थात २ महिना बाँकी छ । निर्वाचनको दिन नजिकिँदै जाँदा निर्वाचन आयोगले आवश्यक तयारीलाई तीव्र पारेको छ भने राजनीतिक दलहरूले पनि निर्वाचनलाई केन्द्रमा राखेर आन्तरिक तयारी तीव्र पारेका छन्।

तोकिएकै मितिमा निर्वाचन गराउन प्रतिवद्ध रहेको सरकार बताईरहेको छ।र सोहीबमोजिम सम्पुर्ण तयारि पनि सुरु भएको जनाएको छ ।
तर निर्वाचनको मिति तोकिएर सम्पुर्ण तयारि सुरु भईसक्दा अझै पनि कतिपय दलले ‘तोकिएको मितिमा निर्वाचन हुन्छ भन्ने कुरामा अझै विश्वस्त हुन नसकिरहेको प्रतिक्रिया दिईरहेका छन् ।

निर्वाचन तोकिएकै मितिमा होस् र भयरहित वातावरणमा निष्पक्ष, स्वतन्त्र ढंगले होस् सबै राजनितीक दलहरुले यहि भनिरहेका छन् । सरकार निर्धारित मितिमै निर्वाचन गराउन अडिक भएर कार्य सुरु गरेको छ । नर्वाचनका लागि सबै वातावरण बनिसकेकाले निर्वाचन हुनेमा कुनै शंका नरहेको सरकारको दावी छ ।

प्रधानमन्त्री सुशीला कार्कीले तोकिएकै मितिमा निर्वाचन हुने बताउनुहुन्छ । सरकार राजनितीक दल र युवाहरुसंगको निरन्तर संवाद र सहयोगले निर्वाचन गर्ने अवस्थामा सरकार पुगेको उहाँको भनाई छ ।

सवैको चाहना छ,मतदाताहरुले निर्भयताका साथ निर्वाचनमा भाग लिन सकुन् र सबै राजनीतिक दलहरुले निर्वाचनमा स्वच्छ प्रतिष्पर्धा गर्न सकुन् भन्ने । तर त्यो चाहना पूरा गर्नुपर्ने हिसावले गर्नुपर्ने कामहरु अहिले पनि नभईरहेको नेकपा एमालेका नेता बताउछन् ।

निर्वाचनको काम तिव्र गतिमा अगाडि बढिरहेका वेला (एमाले)का उपाध्यक्ष विष्णु पौडेलले तोकिएको मितिमा नै निर्वाचन हुन्छ भन्ने कुरामा अझै विश्वस्त हुने अवस्था नरहेको जिकिर गर्नुहुन्छ ।

निर्वाचनका लागि गर्नुपर्ने मुख्यमुख्य कामहरुमा सरकारको ध्यान नगएको जिकीर उहाँको छ। उहाँ निर्वाचनको कामलाई सरकारले राम्रोसँग अघि बढाउनुपर्नेमा जोड दिनुहुन्छ ।

सञ्चार तथा सूचना प्रविधिमन्त्री जगदीश खरेलले निष्पक्ष र धाँधलीरहित ढंगले समयमै निर्वाचन गराउन सरकार लागि परेकोमा जोड दिनुहुन्छ । तोकिएकै मितिमा निर्वाचन गराउन सरकार प्रतिवद्ध रहेको भन्दै सवैको साथ समर्थन आवश्यक रहेको उहाँको जोड छ ।

वर्तमान कार्की नेतृत्वको सरकारको दायित्व निर्वाचनमात्रै नभएर अरु पनि रहेको राष्ट्रिय प्रजातन्त्र पार्टीका महामन्त्री धवलशमशेर जबरा बताउनुहुन्छ ।

युवाहरुको आन्दोलनले यो सरकारलाई ल्याएको भए पनि आन्दोलनको माग सम्बोधन गर्न वर्तमान सरकार पूर्ण रुपमा असफल भएको उहाँको तर्क छ ।

निर्वाचनको लागि मात्रै भए त २०८४ मा निर्वाचन आइहाल्थ्यो नि । आन्दोलनको मर्म र भावना त अर्कै थियो नि । उहाँको तर्क छ । तर उहाँले आफ्नो पार्टी चुनावमा जाने कुरामा कुनै शंका भने नरहेको बताउनुहुन्छ ।

चुनाव फागुन २१ मा हुँदैछ । प्रतिनिधिसभा निर्वाचनका लागि ६० दिन मात्रै बाँकी रहँदा राजनीतिक दलहरू नै निर्धारित मितिमा चुनाव हुनेमा आशङ्का व्यक्त गरिरहेका छन्। तर,आशङ्का होईन चुनावी तयारीमा लाग्न सरकारले आग्रह गरिरहेको छ ।

गत भदौको आन्दोलनका क्रममा सुरक्षा निकायबाट लुटिएका हातहतियारको ठूलो सङ्ख्या फिर्ता नभएका कारण चुनावमा जान कतिपय दलहरू अझै पनि त्रसित बनेको दावी गरिरहेका छन् ।

यस्तो अवस्थामा सवैको चाहना छ,मतदाताहरुले ढुक्क भएर निर्वाचनमा भाग लिन सकुन् र सबै राजनीतिक दलहरुले निर्वाचनमा स्वच्छ प्रतिष्पर्धा गर्न सकुन् । त्यसैले, निर्वाचन सम्पन्न गर्न सरकारले दलहरुलाई र असन्तुष्ट पक्षलाई अझै विश्वस्त बनाउनका लागि थप कसरत गर्न जरुरी छ ।