सुर्खेत । नेपाली कांग्रेसका उपसभापति पूर्णबहादुर खड्काले जेन्जी आन्दोलनमा भाडाका मान्छे परिचालित भएको टिप्पणी गरेका छन् ।
गृह जिल्ला सुर्खेतमा आयोजित पत्रकार सम्मेलनमा उनले आन्दोलनमा कब्जा गर्ने र घुसपैठ गर्ने तत्व सक्रिय भएको आरोप लगाए । उनले भने, “हजारौँ व्यक्तिलाई भाडामा लिएर गरेको जस्तो देखिन्छ, एजेन्टहरू परिचालित भएका छन्।
लामो समयदेखि तयारी गरिएको प्रस्ट हुन्छ।” खड्काले कार्यपालिका, व्यवस्थापिका र न्यायपालिकामाथि लक्षित आक्रमण हुनु गम्भीर विषय भएको उल्लेख गर्दै यस्तो घटनाले देशमा दीर्घकालीन असर पार्ने बताए।
उनले आन्दोलनका नाममा गरिएको क्षतिको कडा निन्दा गर्दै भने, “यो घटनाको जति निन्दा गरे पनि पुग्दैन। आन्दोलन कब्जा गर्ने, घुसपैठ गर्नेहरूलाई खोजीखोजी कारबाही हुनुपर्छ।” उपसभापति खड्काका अनुसार हालसम्म डेढ सय नेताका घर जलाइएका छन् भने कांग्रेसका ५० भन्दा बढी कार्यालयमा क्षति पुगेको छ।
उनले आफ्नै पारिवारिक सम्पत्ति पनि जलाईएको उल्लेख गर्दै भने, “म पहिलेदेखि नै खानदानी थिएँ, राजनीतिमा कमाएको होइन। मेरो कारणले भाइरहेको सम्पत्ति जलाएर अन्याय गरियो।” उनले किसुनजीको सुराही र बाकससम्म जलाइएको, काँग्रेस केन्द्रीय कार्यालयमा रहेको नेपालको नक्शामाथि जुत्ता प्रहार गरी अपमान गरिएको घटना स्मरण गर्दै त्यसप्रति दुःख प्रकट गरे ।
खड्काले दशैँपछि कांग्रेस केन्द्रीय समितिको बैठक बस्ने जानकारी दिँदै हालको अवस्थाबारे निर्मम समीक्षा र आत्मसमिक्षा गर्न आवश्यक भएको बताए। उनले भड्किने काम नगरी संयमता अपनाउन, पार्टीभित्र पनि एकता र सहकार्य बढाउन आग्रह गरे ।
