बुटवल । बुटवल उपमहानगरपालिकाले शिक्षा क्षेत्रमा नयाँ र ऐतिहासिक अभ्यासको सुरुवात गरेको छ। "छोरी पढाऔँ, समाज बनाऔँ" भन्ने मुल नाराका साथ आजबाट बुटवलमा निःशुल्क २ वर्षीय नर्वेजियन मोडेलको अध्ययन कार्यक्रम औपचारिक रूपमा सुरु गरिएको हो।
उपमहानगरपालिकाका अनुसार उक्त कार्यक्रममा ८०% व्यवहारिक र २०% सैद्धान्तिक शिक्षामा आधारित पाठ्यक्रम समावेश गरिएको छ। इलेक्ट्रिकल विषयमा २० जना र सामान्य विषयमा २० जना, गरी जम्मा ४० जना छात्रालाई देशभरिबाट छनोट गरी अध्यापन सुरु गरिएको हो।
कार्यक्रमको औपचारिक उद्घाटन गर्दै बुटवल उपमहानगरपालिकाका मेयर खेलराज पाण्डेले भने, "शिक्षाक्षेत्रमा नयाँ अभ्यासमा हामी अघि बढेका छौं। आजबाट सुरु भएको यस ऐतिहासिक र महत्वपूर्ण क्षणमा ७० वर्षअघि BTI (बुटवल टेक्निकल इन्स्टिच्युट) निर्माण र सञ्चालन गर्नुहुने उड् हफ्टनसहित सम्पूर्ण योगदानकर्तालाई स्मरण गर्न चाहन्छु।"
मेयर पाण्डेले यो कार्यक्रम केवल अध्ययन मात्र नभई समाजमा सकारात्मक सन्देश प्रवाह गर्ने माध्यम बन्ने विश्वास व्यक्त गरे। "छोरीहरूलाई शिक्षित बनाएर समाजको रुपान्तरणमा टेवा पुर्याउने यो पहलले सबै क्षेत्रमा नयाँ र सकारात्मक सन्देश जानेछ भन्ने आशा लिएको छु," उनले भने।
बुटवल उपमहानगरपालिकाले यस कार्यक्रमलाई सामाजिक समावेशिता, महिला सशक्तीकरण र व्यवसायीकतामा आधारित शिक्षाको प्रवर्द्धनतर्फको महत्वपूर्ण कदमका रूपमा लिएको छ।
कार्यक्रम सञ्चालनका सम्पूर्ण पूर्वाधार, पाठ्यक्रम र तालिम प्रक्रियाहरू आजैबाट लागू भइसकेको उपमहानगरपालिकाले जनाएको छ।
