एजेन्सी । अमेरिकाको क्यालिफोर्निया राज्यमा बढ्दो कोरोना भाइरस संक्रमण नियन्त्रणका लागि दैनिक रात्रिकालीन कफ्र्यू लगाइएको छ ।

डिसेम्बर २१ सम्म कफ्र्यू कायम रहने र आवश्यकता अनुसार यसलाई बढाउन सकिने अधिकारीहरुले जनाएका छन् ।

क्यालिफोर्नियामा गत अगष्टकोभन्दा पनि अवस्था बिग्रिएपछि थप नियन्त्रणका उपाय लागु गर्न थालिएको हो । यो राज्यमा १० लाख बढी संक्रमित छन्, जुन टेक्सास पछिकै धेरै हो ।

अमेरिकाभर कोरोनाबाट मृत्यु हुनेको संख्या जुन महिनापछि पहिलोपटक दैनिक २ हजार नाघेको छ । अमेरिकाभर हालसम्म १ करोड २४ लाखभन्दा बढी संक्रमित छन् भने मृतकको संख्या २ लाख ६१ हजार नाघेको छ ।