काठमाडौं । गत सोमबारदेखि प्रमुख प्रतिपक्षी दल नेकपा माओवादी केन्द्रको ‘जनतासँग माओवादी:तराई–मधेश जागरण अभियान’ जारी छ । झापाको कचनकवलदेखि सुरु भएको अभियान कञ्चनपुर पुगेर समापन हुनेछ ।

माओवादी केन्द्रले आजसम्म भएका कार्यक्रममा जनतासंगको अनुभव निक्कै नै उत्साहवर्द्धक रहेको दाबी गरेको छ । जनतामा सकारात्मक भाव पैदा भएको देखिएको अध्यक्ष प्रचण्डको जिकिर छ । ०८४ मा माओवादी पहिलो पार्टी बन्ने संकेत मिलेको अध्यक्ष प्रचण्डले दाबी गर्न भ्याई सक्नुभएको छ ।

अभियानमा माओवादी केन्द्रले एमाले कांग्रेससँग मिल्दा जनतासँग मन टुटेको भन्दै आफ्नो पक्षमा माहोल बटुल्ने कोसिस गरिरहेको छ । नेकपा माओवादी केन्द्रका उपमहासचिव जनार्दन शर्माले आफूहरू जनताका कुरा सुन्न अभियान नै बनाएर अघि बढेको बताउनुहुन्छ ।

जागरण अभियानमा जनताका मुख्य समस्या के छन् ? समस्यालाई समाधान कसरी गर्ने र पार्टीलाई एकतावद्ध गर्ने लगायतका उद्देश्य रहेको शर्माको तर्क छ ।  माओवादी केन्द्रले आफैंले आफैंलाई रुपान्तरण गर्नुपर्नेमा शर्माले पार्टीभित्र जोड दिदै आउनुभएको छ । जनताका धेरै कुरा पूरा गर्नुपर्ने आवश्यकता रहेको जिकिर गर्दै शर्माले पार्टी नेतृत्वको टिम नै बदलिनुपर्ने पनि बताउदै आउनु भएको छ । माओवादी पटकपटक सरकारमा त गयो तर जनतातर्फ फर्किन कहाँनिर चुक्यौ त ? भन्दै आत्मालोचनाका साथ जनतामाँझ पुगेको शर्माको तर्क छ ।

जारी तराई–मधेश जागरण अभियानमा अध्यक्ष प्रचण्ड विगतमा गल्ती गरेको भन्दै जनतासँग क्षमा याचना पनि गरिरहनु भएको छ । कार्यकर्ताकै घरमा बास बस्ने, ‘जनताको मन जित्ने कोसिस’ गरिरहनु भएको छ । उहाँले स्थानीय पान पसलमा गएर पान किनेर खाईरहेका दृश्य पनि आएका छन् ।

माओवादी केन्द्रका सचिव एवं पूर्वमन्त्री देवेन्द्र पौडेलले आफुहरु यो सरकार गिराउने, बनाउने चक्करमा केही समय नलाग्ने बताउनुहुन्छ । जनताको सन्देश पनि सरकार बनाउनेतर्फ नभएको भन्दै पौडेलले हिजो अधिकार प्राप्तीका लागि संघर्ष गरेका जनतालाई थोरै भएपनि आशाको किरण बाल्ने संकल्प गर्दै जनतामाझ गएको बताउनुहुन्छ ।

पार्टी भित्र विभिन्न समस्या भएपनि अभियानका क्रममा अध्यक्ष प्रचण्डले पार्टीभित्र कुनै मतभेद नभएको प्रष्टीकरण दिनुभएको छ । एकताबद्ध भएर पार्टी निर्माणको संकल्प गरेर हिँडेको दाबी उहाँको छ । कहिले कांग्रेससँग, कहिले एमालेसँग समीकरण गरेर माओवादीलाई घाटा मात्रै भएकाले त्यो भूल अब नगर्ने पनि प्रचण्डले जनतामाझ बाचा गर्दै हिड्नुभएको छ ।

प्रचण्डले भेटघाट तथा जनसभाहरूमा पार्टी कमजोर हुनुको कारणका बारेमा पनि कार्यकर्ताहरूलाई बताउने गर्नुभएको छ । तर, प्रचण्डले पार्टीलाई एकतावद्ध र बलियो बनाउँदै लैजाने बताएपनि माओवादीभित्रको विवाद भने यो अभियानका क्रममा पनि प्रकट भएको बताईन्छ ।

प्रतिगमनको खतराविरूद्ध खबरदारी गर्दै संविधान रक्षा गर्न तथा सुशासन, सामाजिक न्याय र समृद्धिको बाटो हुँदै समाजवादी क्रान्तिको आधार तयार गर्न तराई मधेश जागरण अभियान सञ्चालन गरेको माओवादी केन्द्रले जनाएको छ ।

अभियानअन्तर्गत मंगलबार मोरङमा र आज बिहीबार सुनसरीमा कार्यक्रम सम्पन्न भएका छन् । फागुन १६ मा सप्तरी, १७ मा सिरहा, १८ मा धनुषा, १९ मा महोत्तरी, २१ मा सर्लाही, २२ मा रौतहट, २३ मा बारा र २४ मा पर्सामा कार्यक्रम हुनेछन् । चितवनमा फागुन २५ गते नेताहरूले सम्बोधन गर्नेछन् । त्यस्तै, नवलपुर (नवलपरासी पूर्व)मा फागुन २६ गते जागरण सभा हुनेछ । फागुन २७ मा परासी (नवलपरासी पश्चिम), २८ मा रुपन्देही, चैत २ मा कपिलवस्तु, ३ मा दाङ, ४ मा बाँके, ५ मा बर्दिया, ६ मा कैलाली र ७ मा कञ्चनपुरमा जागरण सभा सञ्चालन हुने माओवादी केन्द्रले जनाएको छ ।