काठमाडौं । सरकारलाई सही दिशामा जान निर्देशका निम्ति माओवादी केन्द्रलगायतका दलहरु सडक आन्दोलनमा एकजुट भएका छन् । केही समय अगाडि आफ्नै पार्टीका सभापति पक्राउ परेसँगै रास्वपा पनि सरकारविरुद्धको आन्दोलनमा छ । माओवादीलगायतका दलहरु मोर्चाबन्दी गरेरै सरकारका विरुद्ध जाने तयारीमा छन् । शनिबार माओवादी एक्लैले काठमाडौंमा प्रदर्शन र भेला गरेको छ । समाजवादी मोर्चालाई नै ब्यूत्याएर सरकारलाई घुँडा टेकाउने दाउमा माओवादी केन्द्रका अध्यक्ष प्रचण्ड देखिनुभएको छ । हिजोकै सभामा पनि प्रचण्डले सरकारलाई सडकमा घिसार्ने दिन आउनसक्ने संकेत गर्नुभएको थियो । एमाले नेता राजन भट्टराईले सडकबाट सरकार फ्याँक्ने, बन्दुकको धम्की दिने अराजक शैली रहेको दाबी गर्नुभयो ।

दुई ठूला दल कांग्रेस र एमालेलाई समेत चुनौति दिने राणनीतिमा प्रचण्ड छन् । आमरुपमा बढेको निराशा र असन्तुष्टिलाई क्यास गर्दै प्रचण्डले प्रतिपक्षीमा रहेका दलहरुलाई गोलबन्ध गर्ने रणनीति अख्तियार गर्नुभएको छ । प्रधानमन्त्री केपी शर्मा ओली अध्यादेशको लाइनमा उभिएपछि आलोचित बन्दै जानुभएको छ भने कांग्रेसले अध्यादेश रोकेको छ । पछिल्लो समय कमजोर बन्दै गएको अर्थतन्त्र, बढ्दो वैदेशिक पलायन, खेतबारी बाँझो बन्ने समस्यामा सरकार उदासीन देखिएको भन्दै आलोचना हुने गरेको छ । केही समय अगाडिको दैविक विपत्तिले पनि सरकारप्रति नागरिक आक्रोश बढेको थियो । माओवादी केन्द्रका सचिव लीलामणि पोखरेलले सरकारले आफ्नो कार्यशैली बिगार्दै गएको बताउनुभयो ।

संविधान संशोधनको मुख्य एजेण्डा अघि सारेर बनेको गठबन्धनले जनताको पक्षमा काम गर्न जरुरी छ । अहिलेको विषम परिस्थितिमा बनेको सरकारले पनि जनचाहनालाई सम्बोधन गर्न नसके निराशा बढेर जानेछ । तत्कालीन समयमा अस्थिर बन्दै गएका प्रचण्डको विकल्पमा बनेको सरकारलाई उस्तै बन्ने छुट कदापि छैन ।