काठमाडौं । नेकपा एमालेको पार्टी मुख्यालय बनाउनका निम्ति व्यावसायी मीनबहादुर गुरुङले कीर्तिपुर–२, मैत्रीनगरमा १० रोपनी १४ आना जग्गा उपलब्ध गराएसँगै विरोध र समर्थन उत्तिकै छ । एमालेकै स्थायी कमिटि सदस्य बिन्दा पाण्डेलगायतले यसको खुलेर विरोध जनाएका छन् । कांग्रेस सांसद रामहरि खतिवडाले यो प्रकरणमा प्रधानमन्त्री केपी शर्मा ओली र व्यापारी गुरुङको साख नरहेको टिप्पणी गर्नुभएको छ । करिब ५ लाख भन्दा बढी सक्रिय सदस्य रहेको नेकपा एमालेले कुनै व्यापारीबाट पार्टी कार्यालयका लागि दान लिनु अस्वभाविक रहेको धेरैको बुझाइ रहेको छ । राजनीतिक विश्लेषक प्राडा गोविन्दमानसिंह कार्कीले गुरुङ र ओलीको कदमले शंका उत्पन्न गरेको दाबी गर्नुभयो ।

जग्गा व्यवसायीहरूका अनुसार काठमाडौंमा नयाँ घडेरी विकास भइरहेका क्षेत्रमा औसत ४० लाख रुपैयाँ प्रतिआनामा कारोबार भइरहेको छ । मैत्रीनगर क्षेत्रमा पनि ४० देखि ५० लाख प्रतिआना चलनचल्तीमा छ । ४० लाख रुपैयाँ प्रतिआनामा हिसाब गर्दा १ सय ७४ आना क्षेत्रफल रहेको यस जग्गाको मोल ६९ करोड ६० लाख रुपैयाँ हुन आउँछ । एमालेले चाहेजस्तो अत्याधुनिक भवनसमेत बनाइदिने भएपछि उनको लगानी कम्तीमा पनि डेढ अर्ब नाघ्नेछ । नेकपा एमालेका नेता विष्णु रिजालले मीनबहादुर गुरुङले स्वस्फूर्त रुपमा पार्टीलाई सहयोग गर्दा कसैलाई टाउको दुख्न जरुरी नरहेको बताउनुभयो ।

नेपाली जनताबाट सम्मानजनक मत पाएर मुलुकको बागडोर सम्हाल्ने ठाउँमा पुगेको एमालेले व्यापारीबाट जग्गाजमिन लिएर पार्टी कार्यालय बनाउँदा भोलिका दिनमा स्वार्थ बाँझिने टिप्पणी शुरु भएको छ । एमाले केन्द्रीय कार्यालय २०८२ को दसैं अघि निर्माण सम्पन्न गरेर एमालेलाई हस्तान्तरण गरिने बताइएको छ ।