काठमाडौं । केही दिनअघिबाटै मौसम पूर्वानुमान महाशाखाले मुलुकभर मनसुन भित्रिने र भारी वर्षा हुने  बताएको थियो । नभन्दै शुक्रबार बिहानबाट भारी वर्षा भयो । वर्षाले धेरै जनधनको क्षति गरेको छ । मनसुनी वर्षापछि आएको विपद्मा परेर हालसम्म ६६ जनाको मृत्यु भएको छ । बाढी, पहिरो र डुबानमा परी अन्य ३५ जना घाइते भएका छन् भने ७९ जना बेपत्ता रहेका छन् । सशस्त्र प्रहरीका अनुसार काठमाडौँ उपत्यकामा मात्रै ३४ जनाको मृत्यु भएको छ । काठमाडौँमा ११, भक्तपुरमा ५ र ललितपुरमा १८ जनाको मृत्यु भएको छ ।   पाँचथरमा ५, धनकुटामा २, सोलुखुम्बुमा २, सुनसरीमा १, काभ्रेमा १४, धादिङमा १, सिन्धुपाल्चोकमा ४, दोलखामा ३ जनाको मृत्यु भएको छ । प्रकोपविद् डा. दीपक विक्रम थापाले विपद्को सरकारी तयारी अझै नपुगेको बताउनुभयो । 

बाढीपहिरोमा परेर धेरै नागरिक घाइते भएका छन् । प्रहरीका अनुसार बाढीपहिरो तथा डुबानमा परी उपत्यकामा मात्रै ३२ जनाको मृत्यु भएको छ । १२ जना बेपत्ता रहेका छन् । उपत्यकामा मात्रै बाढीमा फसेका १ हजार ५३ जनाको उद्धार गरिएको छ । उपत्यकामा बाढीले चार वटा पक्की घर भत्काएको छ भने एक हजार २ सय ४४ घर डुबानमा परेको प्रहरी प्रधान कार्यालयका एसएसपी विश्व अधिकारीले जानकारी दिनुभयो । उता, विपद् व्यवस्थापन विज्ञ सुबोध ढकालले विपद् कार्य गर्नका लागि कामको बाँडफाँट आवश्यक रहेको बताउनुभयो । 

प्रहरीका अनुसार देशभर ४४ जिल्लामा बाढी, पहिरो, डुबान र कटानले क्षति पुर्‍याएको छ । त्यसमध्ये ३९ जिल्लाका विभिन्न सडक खण्ड पूर्णरुपमा अवरुद्ध भएका छन् । केही ठाउँमा सडक खुलाउने प्रयास भइरहेको प्रहरीले जनाएको छ । वर्षा भोलिसम्म रहने भएकोले सतर्क रहन सरकारले सबैमा अपिल गरेको छ । सरकारको तयारी भने फितलो देखिएको छ ।