काठमाडौं । नेपालले कुटनीतिका क्षेत्रमा अपेक्षित सुधार गर्न नसकेको बेलाबखत चर्चा हुने गर्दछ । संगै सिमाना जोडिएका दुई देश भारत र चीनसँग पनि एकाकार सम्बन्ध हुन नसक्नु नेपालका लागि बिडम्बना बन्दै गएको छ । सरकार परिवर्तनपिच्छे विभिन्न धारणाहरु आउँदा कुन देशका लागि कुन नीति हो भन्ने स्पष्ट हुन सकिरहेको छैन । एक देशको प्यारो बन्न अर्को मुलुक चिढाउने विषय कुनैपनि हालतमा राम्रो मान्न सकिदैन ।

पछिल्लो समय नागरिकस्तरबाट अहिलेको समिकरणले भारतसँग बिग्रिएको सम्बन्धमा सुधार गर्न खोजेको प्रतिक्रिया आएको छ । नागरिक अगुवा सुन्दरमणि दिक्षितले समिकरण बन्दै गर्दा भ्रष्टाचारका फाइलहरु बन्द भएपनि भारतसँगको सम्बन्धमा केही सुधार आएको दाबी गर्नुभएको छ ।

नेपालको राजनीति मौसम बदलिएझैँ बदलिरहन्छ । अस्थिर राजनीतिका कारण स्थायित्व र सुशासनमा बाधा पर्ने गरेको छ । अहिले बनेको समिकरणले राजनीतिक स्थायित्वलाई जोड दिएको छ । प्रधानमन्त्री केपी शर्मा ओलीले पनि कांग्रेस सभापति शेरबहादुर देउवालाई बाचा गरेअनुसारको भूमिका निर्वाह गर्ने बताइरहेका छन् ।

कुनैपनि हालतमा धोकाको राजनीतिक अब सम्भव नहुने ओलीको जिकिर रहेको छ । नेपाली कांग्रेसका नेता डा. चन्द्र भण्डारीले पनि ओली–देउवाको मिलन समयको माग रहेको बताउनुभएको छ ।

नेपाल विकासको बाधक सबैभन्दा ठूलो भ्रष्टाचार हो, जबसम्म यसको नियन्त्रण गर्ने बलियो कानून बन्दैन तबसम्म मुलुकको समृद्धि सम्भव देखिदैन । अहिले दुई ठूला दलहरुको सहकार्यले भ्रष्टाचारीलाई जोगाउने भन्दा पनि कानूनी कठ्घरामा उभ्याउनेतिर प्रयत्न गर्न जरुरी रहेको छ । यो गठबन्धनको औचित्य समेत पुष्टि गर्नु आवश्यक रहेको छ ।