काठमाडौं। प्रतिनिधिसभा बैठकमा एमाले सचिव एवं सांसद योगेश भट्टराईले प्रयोग गरेको माओवादी हिंसा भन्ने शब्दप्रति आजपनि आपत्ति जनाइयो ।

उल्टै योगेशमाथि जनयुद्धका नाममा हरियार सप्लाइ गरेको आरोप लागेको छ। माओवादी केन्द्रका सांसद छिरिङ डम्डुल लामा (भोटे) ले एमालेका सचिव भट्टराईले जनयुद्धको नाममा चन्दा असुलेर हतियार तस्कर गरेको आरोप लगाउनुभयो ।

उहाँले ०५२ सालको सशस्त्र जनयुद्ध एकात्मक शासन व्यवस्थाको विरुद्ध लडेको मुक्ति युद्ध र जनताको आवाज भएको दाबी गर्नुभयो। जो जनमुक्ति र वर्गमुक्तिको बिगुल प्रचण्डको नेतृत्वमा फुकिएको भोटेको तर्क छ ।

योगेशले प्रयोग गरेको हिंसा शब्दमा नेकपा एमालेले समर्थन गरेको छ । तत्कालीन सशस्त्रद्वन्द्वमा भएका घटनाहरु हिंसा नै रहेको एमाले सांसद एवं सत्ता पक्षका प्रमुख सचेतक महेश बर्तौलाको भनाइ रहेको छ ।

माओवादीकै हिंसाका कारण नेपालको विकास र समृद्धि पछि परेको बर्तौलाको दाबी रहेको छ। तत्कालीन समयमा २०६५ सालमै लोडसेडिङमुक्त बनाउने तयारी भएपनि माओवादीकै कारण रोकिएको भट्टराईको अभिव्यक्तिलाई बर्तौलाले बचाउ गर्नुभएको छ।

संसदमा योगेशले बोलेको शब्दलाई पूर्व एमाले नेता एवं हाल नेकपा एकीकृत समाजवादीका प्रमुख सचेतक मेटमणि चौधरीलाई दासत्वको संज्ञा दिनुभएको छ । ओलीको नजरमा पर्नका निम्ति योगेशले आफूलाई नंग्याइरहेको चौधरीले बताउनुभएको छ।

टीआरसी पारितको चरणमा पुगेको अवस्थामा यस्ता गतिविधि आवश्यक नरहेको उहाँको भनाइ छ । संसदको अधिकांश समय वादप्रतिवादमै बित्ने गरेको दृष्टान्तहरु छन् ।

हिंसा शब्दले निम्त्याएको बहसमा सत्ता र प्रतिपक्षको हैसियत र दिमाखी वजनलाई दर्शाएको छ । गर्नुपर्ने काम छोडेर गलत बाटोमा लम्किरहेको बहसले मुलुकलाई दुःखबाहेक केही दिन सक्दैन ।