काठमाडौं । सरकार निर्माण भएको करिब डेढ महिना बित्दा प्रतिपक्षीहरूले आलोचना शुरु गरिरहेका छन् । संविधान संशोधनदेखि राजनीतिक स्थायित्वको नारा बोकेर गरिएको सत्ता सहकार्यभित्र धेरै तुष रहेको भन्दै माओवादी केन्द्र, रास्वपा आक्रामक बनेका छन् । स्वार्थ प्रेरित सहकार्य भन्दै यी दलहरूले डेलिभरीमा समस्या सिर्जना भइरहेको दाबी गरेका छन् । विभिन्न नियुक्तिदेखि साना दलहरूलाई तर्साउनका लागि कांग्रेस–एमालेले घाँटी जोडेको माओवादीका नेताहरूको तर्क रहेको छ । यता, नेपाली कांग्रेसका उपसभापति धनराज गुरुङले प्रतिपक्षीमा पुग्नु पर्दाको पीडा माओवादी, रास्वपाहरुले पोखिरहेको आरोप लगाउनुभएको छ । तत्कालीन समयमा तस्करी र भ्रष्टाचारको आरोप लागेकाहरूलाई खुलेआम छोडिएको विषयलाई कोट्याउँदै गुरुङले सुशासनका कुरा गरेर जग नहँसाउन आग्रह गर्नुभयो ।
कांग्रेस एमालेको समीकरणले संविधान संशोधनको मुद्दालाई अगाडि बढाएकोले राप्रपालगायतका दलहरूले समर्थन गरेका छन् । संविधानमा रहेका लुप होलहरुलाई सच्याउँदै विभिन्न दफा उपदफाहरू परिमार्जन आवश्यक देखिएको छ । कतिपय दलहरूलाई दुई ठूला शक्तिले आफूहरूको अस्तित्व संकटमा पार्ने भित्री डर रहेको छ । एमाले कांग्रेसपनि थ्रेसहोल्ड बढाउने रणनीतिमा लागेका छन् । राप्रपाका नेता ध्रुवबहादुर प्रधानले संविधानमा रहेका धेरै विषयहरू परिमार्जन आवश्यक रहेको बताउनुभयो । संशोधनको मुद्दामा आफूहरूको सरकारलाई साथ रहने उहाँको भनाइ रहेको छ ।
कांग्रेस एमालेको अग्निपरीक्षामा केही साना दलहरूको पनि समर्थन रहेको छ । आम नागरिकमा छाएको निराशालाई कम गर्नका निम्ति सरकारको गति सही बाटोमा जान जरुरी रहेको छ । समग्रमा मुलुक सञ्चालन गर्ने मुख्य निकाय बलियो र स्थिर बन्न आवश्यक छ ।
