काठमाडौं । सत्ताबाट बाहिरिनु परेपछि माओवादी केन्द्रका अध्यक्ष पुष्पकमल दाहाल निकै हतास देखिएका छन् । २०६४ सालदेखि लगातार प्रत्यक्ष परोक्ष रुपमा सत्तामा टाँसिएको माओवादीलाई प्रतिपक्षीमा बस्न पनि सकस भएको देखिन्छ । पार्टीको आकार समेत खुम्चिदै गएपनि प्रचण्डलाई पिर परेको छ । यतिबेला पार्टीभित्रै पनि जनार्दन शर्मा पक्षले प्रचण्डमाथि दबाब बढाइरहेको छ । शुरुमा जनार्दन पार्टीबाटै बाहिरिन थालेको हल्ला फैलाएको माओवादीले यतिबेला साम्य पार्न प्रयत्न गरिरहेको छ । जनार्दन र बर्षमान पुन विप्लप र माधव नेपालसँग पार्टी एकता गर्ने विषयलाई स्वीकार्न सकिरहेका छैनन् । प्रचण्डले अहिलेको समयलाई पार्टी बलियो बनाउने अवसरका रुपमा लिएपनि माधव नेपाल उहाँले दिएको धोका र अस्थिरतालाई बिर्सनुभएको छैन । नेकपा एकीकृत समाजवादीका प्रवक्ता जगन्नाथ खतिवडाले पनि प्रचण्डको सक्रियता बढेको भन्दै नेपालले वास्ता नगरेको दाबी गर्नुभयो ।

प्रचण्डलाई अहिले आफ्नो पार्टी बनाउने र आगामी निर्वाचनमा जनताको मन जितेर पुनः सरकार बनाउने वा सरकारमा जाने वैकल्पिक अवसर प्रशस्त छ । तर प्रचण्डमा त्यो बाटो रोज्नेभन्दा टुटफुट भएका कम्युनिस्टहरूलाई जम्मा पार्ने अनि त्यसैका बलमा ठुुलो पार्टी देखाउने हुटहुटीले बढी काम गरेको देखिन्छ । नेपालका कम्युनिष्टहरुका फुट र जुट विचित्रको रहेको छ । राजनीतिक विश्लेषक जैनेन्द्र जीवनले माओवादी–समाजवादी एकता सहजै हुन नसक्ने बताउनुभयो ।

पार्टी एकताको आधार र धरातलबारे प्रचण्डले स्पष्ट जवाफ दिनुभएको छैन तर, आन्तरिक छलफललाई तीब्रता दिनुभएको छ । बरु प्रचण्डको हतारोलाई एकीकृत समाजवादीका अध्यक्ष नेपाल र नेकपाका महासचिव विप्लवले खासै भरपर्दो नदेखेर ‘पर्ख र हेर’ को नीति अवलम्बन गरेका छन् । एकीकृत समाजवादीमा माओवादीसँग एकता गर्ने पंक्ति अल्पमतमा रहेको छ ।