काठमाडौं । प्रतिनिधिसभाबाट सङ्क्रमणकालीन न्यायसम्बन्धी (टीआरसी) विधेयक पारित भएको छ । आज बसेको बैठकले बेपत्ता पारिएका व्यक्तिको छानबिन, सत्य निरूपण तथा मेलमिलाप आयोग (तेस्रो संशोधन) विधेयक, २०८१ पारित गरेको हो । आजको प्रतिनिधिसभा बैठकमा मुख्य दलका शीर्ष नेताहरूले सम्बोधन गर्दै नेपालमा संक्रमणकालीन न्याय सम्बन्धीको विधेयकलाई अन्तिम रूप दिनका निम्ति सबै क्षेत्र तम्सिएको बताएका छन् ।
यसै विषयमा बोल्दै प्रधानमन्त्री केपी शर्मा ओलीले टीआरसी विधेयक संसदबाट पारित भएसँगै सहमतिका साथ आयोगहरू बनाउने बताउनुभएको छ । ओलीले टीआरसी विधेयकमा सहमति जुट्नु खुसीको विषय भएको पनि बताउनुभयो । सर्वसम्मतिबाट पीडितमैत्री र कुनै करकापमा नपरी सहमतिका साथ यस दस्ताबेज अगाडि बढाएको ओलीको दाबी छ । ऐनले आयोगलाई काम गर्न अनुकूलता प्रदान गर्ने भन्दै उहाँले सहमतिका साथ प्रभावकारी आयोग बन्ने र त्यसलाई सरकारको तर्फबाट भरपुर सहयोग हुने बताउनुभयो ।
नेपाली कांग्रेसका सभापति शेरबहादुर देउवाले टीआरसी विधेयक कानुनमा परिणत भएपछि द्वन्द्वका सबै पक्षले न्यायको अनुभूति गर्ने विश्वास व्यक्त गर्नुभएको छ । पूर्व प्रधानमन्त्री समेत रहनुभएका देउवाले सङ्क्रमणकालीन न्यायलाई टुङ्गोमा पुर्याउने बिन्दुमा अन्तर्राष्ट्रिय जगतले समेत नियालिरहेको बताउनुभयो । उहाँले विभिन्न अन्तर्राष्ट्रिय कानुनलाई समेत मध्यनजर गरेर विधेयक अगाडि बढाइएको भन्दै शान्ति प्रक्रियाका बाँकी काम पुरा गर्न लागिपरेको स्पष्ट पार्नुभयो ।
त्यस्तै, नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले टीआरसी विधेयकमा सहमतिपछि हजारौं सहिदहरूको सपना पूरा हुने विश्वास व्यक्त गर्नुभएको छ । टीआरसी विधेयक पारित गर्नुअघि प्रतिनिधिसभामा सम्बोधन गर्दै शान्ति प्रक्रियाको पूर्णतासँगै राजनीतिक क्रान्तिको एउटा अध्यायले पूर्णता पाएको दाबी गर्नुभयो । उहाँले अब परिवर्तनका उपलब्धिलाई संस्थागत गर्दै समृद्धिको महान यात्रामा अघि बढ्ने बाटो पाएको जिकिर गर्नुभयो ।
पीडितलाई न्यायको आभास हुने गरी टिआरसी टुंग्याउन सबै दलहरू सकारात्मक देखिएका छन् । अन्तर्राष्ट्रिय मूल्यमान्यतालाई पनि मर्न नदिने गरी दुवै पक्षलाई उत्तिकै प्राथमिकता दिने दलहरूको तयारी रहेको छ ।
