काठमाडौं । नवनियुक्त महान्यायाधिवक्ता रमेश बडालले पद तथा गोपनीयताको शपथ लिनुभएको छ । प्रधानन्यायाधीश विश्वम्भरप्रसाद श्रेष्ठले महान्यायाधिवक्ता बडाललाई पद तथा गोपनीयताको शपथ खुवाउनुभएको हो ।
प्रधानमन्त्री केपी शर्मा ओलीको सिफारिसमा हिजो राष्ट्रपति रामचन्द्र पौडेलले संविधानको धारा १५७ को उपधारा (२) बमोजिम वरिष्ठ अधिवक्ता बडाललाई महान्यायाधिवक्ता पदमा नियुक्त गर्नुभएको हो ।
शपथ समारोहमा राष्ट्रपति रामचन्द्र पौडेल,उपराष्ट्रपति रामसहाय यादव,प्रधानमन्त्री ओली,प्रतिनिधि सभाका सभामुख देवराज घिमिरे,राष्ट्रिय सभाका अध्यक्ष नारायणप्रसाद दाहाललगायत उपस्थित हुनुहुन्थ्यो ।
सरकार फेरिएसँगै सरकारको कानुनी सल्लाहकार महान्यायाधिवक्ता पनि फेरिने प्रचलन छ । बडाल यसअघि पनि ओली प्रधानमन्त्री हुँदा महान्यायाधिवक्ता हुनुभएको थियो ।
