काठमाडौं । प्रधानमन्त्री पुष्पकमल दाहाल प्रचण्डले संसदबाट विश्वासको मत प्राप्त गर्न सक्नुभएन । उहाँको पक्षमा ६३ र विपक्षमा १९४ मत खसेका छन्, तटस्थमा १ मत रहेको छ । भावी प्रधानमन्त्रीका लागि एमाले अध्यक्ष केपी शर्मा ओलीलाई अगाडि सारिएको छ । काम चलाउ प्रधानमन्त्री प्रचण्डले दुई ठूला दलहरू कांग्रेस र एमालेबीच भएको सात बुँदे सहमतिमा जालझेल रचिएको आरोप लगाउनुभएको छ । राति कुनै अमुक व्यापारीको घरमा गएर गरिएको सम्झौता मुलुक र राष्ट्रका लागि नभई षडयन्त्र रहेको उहाँको भनाइ छ । राष्ट्रिय सहमतिको विमर्श संसद् छोडेर मध्यराति गरिनु नै षडयन्त्रको पराकाष्ठा भएको प्रचण्डको दाबी छ ।
नेपाली कांग्रेसका प्रमुख सचेतक रमेश लेखकले आफ्नो मुखमा लागेको धुलो नहेरी ऐना मात्रै पुछ्न खोज्दा समस्या सिर्जना भइरहेको बताउनुभयो । प्रचण्डतर्फ इंगित गर्दै लेखकले अरूका गल्ती मात्रै देखेर आफू नसुध्रिँदा दुई ठूला प्रतिस्पर्धी दल एक ठाउँमा आउनु परेको बताउनुभयो ।
नेकपा एमालेका सांसद योगेश भट्टराईले प्रचण्डलाई जाने ठाउँ कतै नरहेको भन्दै एकताबद्ध भएर राष्ट्रिय सहमतिमा आउन आग्रह गर्नुभयो । आफ्नो पार्टीका अध्यक्ष केपी शर्मा ओलीले स्वर्ग र नर्कसँगै जाने विषय सहमतिमै जाउ भन्नका लागि उठाएको भट्टराईको दाबी थियो । आगामी दिनमा धम्की नभएर सहमतिमै जान खोज्नु बुद्धिमानी हुने उहाँको भनाइ छ ।
राष्ट्रिय स्वतन्त्र पार्टी (रास्वपा)का सभापति रवि लामिछानेले विगतमा ठूला दलहरू मिलेर सुशासन कायम गरिदिएको भए आफूहरूको जन्मै नहुने ठोकुवा गर्नुभयो । अहिलेको अवस्थामा दुई दलबीच भएको सहमतिमा तुष लुकेको उहाँको भनाइ छ ।
कांग्रेस–एमालेको नयाँ सहकार्यले मुलुकमा राजनीतिक स्थायित्वको परिकल्पना गरिएको छ । दुई ठूला दलहरूले जनतालाई डेलिभरी दिने गरी काम गर्नसक्ने विश्वास लिइएको छ । संविधान संशोधनदेखि निर्वाचन प्रणालीमा सुधार गरिने विषय आजको आवश्यकता रहेको र त्यसतर्फ अहिलेको सत्ता सहकार्य जानुपर्ने विश्लेषकहरूको सुझाव छ ।
