काठमाडौं।सहकारीको बचत रकम दुरुपयोग संसदीय छानबिन विशेष समितिले अब सहकारी पीडितसँग पनि छलफल गर्ने भएको छ। समितिको आजको बैठकले सहकारी क्षेत्रमा देखिएका समस्या र त्यसबाट भोग्नुपरेको समस्याका बारेमा पीडितहरुसँग छलफल गर्ने निर्णय गरेको हो।

सहकारी पीडितका नाममा गठन गरिएका विभिन्न समितिका संयोजक र प्रतिनिधिमूलक पीडित व्यक्तिसँग भोलीको बैठकमा छलफल गरिने समिति संयोजक सूर्य थापाले जानकारी दिनुभयो।

सहकारी क्षेत्रलाई व्यवस्थित गर्न र तथ्य प्रमाणसम्म पुग्न पीडितहरुको सुझाव महत्वपूर्ण हुने उहाँको भनाइ छ। त्यस्तै आज सहकारी विभागका पूर्वरजिष्टारदेखि हालका रजिष्टारसँग सामूहिक छलफल गरिएको छ।

छलफलका क्रममा सहकारी कर्जा सूचना केन्द्र नहुनु, बचत र ऋणको सीमा नराख्नुले पनि सहकारी समस्यामा परेको धारणा आएको थापाले बताउनुभयो।

आजको छलफलमा सहकारी विभागका पूर्व र वर्तमान रजिष्टारहरुले ऐन–नियमको अभावमा सहकारी क्षेत्रको नियमनमा बेवास्ता गर्दा बचतकर्ताहरुको रकम अपचलन भएको भनाइ राखेका थापाले बताउनुभयो।