काठमाडौं । नेपालका दुई ठूला दलहरू एकठाउँमा उभिएपछि राजनीतिक वृत्तमा गरमागरमी शुरु भएको छ । प्रायः कम मात्रामा एक ठाउँमा देखिने नेपाली कांग्रेस र नेकपा एमालेको यो सहकार्यलाई विभिन्न कोणले अर्थ्याउन थालिएको छ । कतिपयले राष्ट्रिय आवश्यकताको चित्रण गरेका छन् भने कतिपयले भ्रष्टाचारका फाइल खुल्न थालेपछि आफ्नालाई जोगाउन यो समीकरण बनेको दाबी गरेका छन् । कांग्रेस र एमालेले भने अस्थिरतालाई चिर्न दुई दल एक ठाउँमा आएको जिकिर गरेका छन् । एमाले प्रमुख सचेतक महेश बर्तौलाले संविधान र कानूनी प्रबन्धहरूलाई अवरोध गर्न नभई राष्ट्रिय आवश्यकताका आधारमा समीकरण बनेको दाबी गर्नुभयो ।
नेपालको संसदीय व्यवस्थामा सरकार बन्ने र ढल्ने पक्रिया नौलो नभएपनि कांग्रेस एमालेको सहकार्य अनौठो रहेको वामपन्थी नेता धर्मेन्द्र बास्तोलाको तर्क छ । हिजोका दिनमा दुई ठूला पार्टी सत्ता र प्रतिपक्षमा बस्दै आइरहेकोमा एक्कासी मिलनको बिन्दुमा पुग्दा संशय पैदा गरेको उहाँको भनाइ छ ।
नेपाली कांग्रेसका सांसद रामहरि खतिवडाले प्रधानमन्त्री पुष्पकमल दाहाल प्रचण्डको अस्थिर स्वभावले आजित भएर एक ठाउँमा आउनुपरेको बताउनुभयो । एमाले अध्यक्ष केपी शर्मा ओली र सभापति शेरबहादुर देउवाको यो कदम सुझबुझपूर्ण र विवेकी रहेको उहाँको दाबी छ ।
नेपालको राजनीति शक्ति राष्ट्रहरूको गुमराहमा परिरहेको नेपाल मजदुर किसान पार्टीका नेता एवं सांसद प्रेम सुवालको भनाइ छ । मुलुकको सार्वभौमिकत्ताको चिन्ता नगरी स्वार्थ र अरूको गोटी बन्ने प्रचलनले एमसीसीलगायतका योजना पारित भएको सुवालको जिकिर छ ।
राजनीतिक विश्लेषक प्राडा प्रेम शर्माले देशको अस्थिरता चिर्न र संविधानका त्रुटि सुधार्नका लागि गठबन्धन गरिएको भए उपयुक्त हुने तर्क गर्नुभयो । यद्यपि विगतका नजिर र दृष्टान्तले ढुक्क भइहाल्ने अवस्था नरहेको उहाँको भनाइ थियो ।
मध्यरातमा भएको सत्ता उलटपुलटले प्रधानमन्त्री प्रचण्ड मात्र नभई रास्वपा र नेकपा एकीकृत समाजवादीलाई बेचैन भएको छ । अहिलेको समीकरण के का लागि भन्ने कुरा स्थापित गर्न कांग्रेस एमालेले नसके उनीहरूका लागि समेत घातक हुने देखिन्छ ।
