काठमाडौं । प्रमुख प्रतिपक्षी कांग्रेसका पदाधिकारी, पूर्वपदाधिकारीसहितको आज अनौपचारिक बैठक वस्दैछ । अनौपचारिक बैठकमा संसद् अधिवेशन बोलाउने विषयमा समेत छलफल हुने भएको छ ।

कांग्रेस सहमहामन्त्री प्रकाशशरण महतले सरकारले तत्काल संसद् अधिवेशन नडाके कांग्रेसको अगुवाइमा संसद् अधिवेशनका लागि समावेदन गरिने बताउनुुभएको छ ।

दसैंअघिको अनौपचारिक बैठकले नै संसद् अधिवेशन बोलाउने निर्णय कांग्रेसले गरेको थियो । असोज १९ गते केन्द्रीय कार्यसमितिको बैठकमा निर्णय गरेर संसदीय दललाई प्रक्रियाका लागि निर्देशन दिने तयारी थियो । पार्टीका आधा दर्जन केन्द्रीय सदस्यलाई कोरोना संक्रमण देखिएपछि बैठक स्थगित भएको थियो ।

बैठक कात्तिक २१ गतेका लागि बोलाइएको छ । त्यसअघि वरिष्ठ नेता रामचन्द्र पौडेल पक्षले उठाएका विषय र महाधिवेशनको तयारीबारे छलफल गर्न आज पदाधिकारी, पूर्वपदाधिकारीसहितको अनौपचारिक बैठक डाकिएको छ ।