काठमाडौं । अहिलेको गठबन्धन मन नमिलेको दिमाग मिलेको भएको माओवादी नेता बिडारीको भनाइ, सांसदहरुले भत्ता पचाउने बाहेक केहि काम नगर्ने आरोप ।

नेकपा माओवादी केन्द्रका नेता रामनारायण बिडारीले अहिलेको गठबन्धन मन नमिलेको दिमाग मिलेको भएको बताउनुभएको छ ।
दिमाग र मन फरकफरक भएकाले गठबन्धनमा बाहिर मिलेकोजस्तै देखिए पनि भित्र भने मतभेद कायमै रहेको बताउनुभएको छ ।

प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्डले नेपाली कांग्रेससँगको गठबन्धन तोडेर नेकपा एमाले, रास्वपासँगको सहकार्यमा सरकार गठनको आज १ सय दिन पूरा भएको छ । नेता बिडारीले सय दिनसम्म गठबन्धन टिक्नु नै राम्रो पक्ष मान्नुपर्ने तर्क गर्नुभएको छ ।

नेपाली रेडियो नेटवर्कको नेपाली बहसमा पत्रकार ऋषि धमलासँग कुरा गर्दै नेता बिडारीले सत्तापक्षका नेता, कार्यकर्ता तथा दल टिकाउनमा र विपक्षका नेता र दलहरु सत्ता भत्काउनमा मात्रै तल्लीन रहेको आरोप लगाउनुभयो । बकुल्लाले माछा कुरे जस्तै विपक्षी दलले सत्ता कुरिराख्ने सत्तापक्ष भने जोगाउन लाग्ने यहि खेलले अहिले देश अगाडि बढेको नेता बिडारीको भनाइ छ ।

नेता, मन्त्री र कार्यकर्ताले देश विकाश, जनहित, जनकल्याणकाबारे सोच्ने छलफल गर्ने र निर्णय गर्नेजस्ता कार्यहरु नगरेका कारण देश उधो गतिमा गइरहेको टिप्पणी गर्नुभयो ।

यस्तै अर्को प्रसंगमा नेता बिडारीले सांसदरु भत्ता पचाउन बाहेक केहि काम गर्ने नदेखिएको आरोप लगाउनुभयो । प्रतिनिधिसभाको हिजोको बैठकमा आगामी आर्थिक वर्षका लागि शिक्षा, विज्ञान तथा प्रविधि मन्त्रालय, श्रम, रोजगार तथा सामाजिक सुरक्षा मन्त्रालय र कृषि तथा पशुपन्छी विकास मन्त्रालयका लागि विनियोजित बजेटमाथि छलफल गर्ने कार्यसूची तय थियो । तर बजेट तथा योजनामाथि संसद्मा हुने छलफलमा सांसदकै रुचि देखिएको छैन भने हाजिर गर्दै सांसदहरु बाहिरिएका छन् ।

संघीय संसदमा प्रदेश सभामा रोजगारीका निम्ती सांसद आएको र जागिर खाएर बस्ने बाहेक एउटा निजामति कर्मचारीले गर्ने कामसम्म पनि नगर्ने बताउनुभयो ।

जनतासामु बोलेको र गरेका प्रतिवद्धताहरु पदमा पुगेपछि सबै बिर्सिने प्रवृति पूरानै रहेको पनि उहाँको भनाइ छ ।
सांसदलाई मन नभएको र सरकारलाई पनि ध्यान नहुँदा सांसदहरु संसदमा बस्न नचाहेको नेता बिडारीको तर्क रहेको छ ।