काठमाडौं । संसद्मा आजबाट बजेटमाथि छलफल शुरु भएको छ । बजेटमा सत्ता र प्रतिपक्षका सांसदहरूले आआफ्ना धारणा राखिरहेका छन् । प्रतिपक्षीले महत्त्वाकाङ्क्षी बजेट भनिरहँदा सत्तापक्षले कार्यान्वयनमा सहज हुने गरी बजेट आएको दाबी गरिरहेको छ ।
नेकपा एमालेका सांसद एवं पूर्वअर्थमन्त्री विष्णु पौडेलले अर्थमन्त्री वर्षमान पुनले बजेटमार्फत जोखिम उठाएको बताउनुभएको छ । पुन आफैँले जोखिम उठाएको र सो जोखिम समाधान गर्न पनि तत्पर रहेको पौडेलको भनाइ थियो । मन्त्री पुनले सहज यात्रा नरोजी अप्ठ्याराहरूका बीचमा काम गर्ने अठोट लिएको पौडेलको दाबी छ । बाहिर मानिसहरूको चर्चा र आशङ्काकै बीच १८ खर्ब ६० अर्बको बजेट आउनु यर्थाथपरक रहेको उहाँको तर्क छ ।
नेपाली कांग्रेसका प्रवक्ता एवं पूर्वअर्थमन्त्री प्रकाशशरण महतले सरकारले ल्याएको आगामी आर्थिक वर्षको बजेटले राष्ट्रिय प्राथमिकतालाई तिलाञ्जली दिएको आरोप लगाउनुभएको छ । आवश्यकताको आधारमा बजेट विनियोजन नगरेर सरकारले आफू खुसी अघि बढ्ने बाटो लिएको उहाँको भनाइ छ । महत्त्वाकाङ्क्षी भन्दा पनि कार्यान्वयनको दिशामा लैजान सकिने बजेट आवश्यक रहेको बताउँदै उहाँले तीतो औषधि खान तयार हुनुपर्नेमा जोड दिनुभयो ।
पूर्व गभर्नर एवं अर्थविद् दीपेन्द्रबहादुर क्षेत्रीले बजेट समय सापेक्ष रुपमा आएको दाबी गर्नुभएको छ । गत सालको तुलनामा केही आकार बढेपनि यो अझै कम भएको उहाँको भनाइ छ । राजश्वका लक्ष्य र खर्चको मिलानलाई सही ढंगले लैजान सके अल्पविकसित मुलुकका लागि यो बजेट स्वाभाविक रहेको उहाँको भनाइ छ ।
बजेटमा सबै क्षेत्रबाट समेटिनुपर्ने सुझावमा कमजोरी देखिएको छ । स्वयं सत्तापक्षका सांसदहरू यसबारे सन्तुष्ट देखिएका छैनन् । संसद्को अवरोधका बीच आएको बजेटमा जेठ १५ गतेमात्रै सहमति भएको थियो । यो बीचमा सत्ता र प्रतिपक्षका सांसदहरूले पर्याप्त छलफल गर्न पाएनन् । हरेक वर्ष आएको बजेट कार्यान्वयन गर्न चुनौती देखिँदै आएको छ । सरकारको अस्थायी संरचना र उथलपुथलले समस्या सिर्जना हुने गरेको छ । यसैबीच, बजेटका बारेमा विभिन्न प्रकारका टिप्पणी आइरहेका बेला अर्थमन्त्री वर्षमान पुन भने हौसिएका छन् ।
