काठमाडौं। तत्कालीन राजा वीरेन्द्र शाहको वंश नास हुने गरी भएको नारायणहिटी दरबार हत्याकाण्डको आज २३ वर्ष पूरा भएको छ । तर, यो घटना अझै रहस्यमय नै रहेको छ।

वि.सं.२०५८ साल जेठ १९ गते राति ९ बजे नारायणहिटी राजदरबारभित्र भएको गोलीकाण्डमा तत्कालीन राजा वीरेन्द्रसहित रानी ऐश्वर्य, युवराज दीपेन्द्र, अधिराजकुमार नीराजन, राजकुमारी श्रुति, शान्ति राज्यलक्ष्मी सिंह, शारदा राज्यलक्ष्मी शाह, शाहज्यादी जयन्ती राज्यलक्ष्मी शाह, कुमार खड्गविक्रम शाह र धीरेन्द्र शाहको मृत्यु भएको थियो ।

घटनामा कोमल शाह, शोभा शाही, कुमार गोरखशमशेर र केतकी चेस्टर घाइते भएका थिए । उक्त दरबार हत्याकाण्डमा सर्वोच्च अदालतका तत्कालीन न्यायाधीश केशवप्रसाद उपाध्याय र सभामुख तारानाथ रानाभाट रहेको उच्चस्तरीय छानबिन समितिले सार्वजनिक गरेको प्रतिवेदनमा तत्कालीन युवराज दीपेन्द्रलाई दोषी ठहर गरेको भएपनि आमनागरिकले त्यसलाई स्वीकार गर्न सकेका छैनन् ।

शाही शक्ति यूवा नेपालका अध्यक्ष पशुपति खड्काले पनि दिपेन्द्रले नै घटना घटाएको तर राजनीतिक प्रोपोगाण्डा गर्न गलत प्रचार भइरहेको दाबी गर्नुभयो ।

रहस्यको पर्दा खुल्न नसकेको यो हत्याकाण्डको यथार्थ छानबिन हुनुपर्ने माग उठ्दै आएको छ । विभिन्न दलका नेताहरूले सरकार बाहिर रहँदा दरबार हत्याकाण्डको रहस्य पत्ता लगाउने वाचा गरेपनि पदमा पुगेपछि कहिल्यै प्राथमिकता दिएनन् ।

गणतन्त्र स्थापनापछि पहिलो पटक प्रधानमन्त्री बनेका माओवादी केन्द्रका अध्यक्ष पुष्पकमल दाहाल प्रचण्डले नारायणहिटी हत्याकाण्डको छानबिन गरेर सत्यतथ्य बाहिर ल्याउने वाचा गर्नुभएको थियो । प्रचण्ड अहिले पनि प्रधानमन्त्री छन् ।

तीन पटक प्रधानमन्त्री बन्दा पनि उहाँले यस विषयमा कुनै पहलकदमी लिएको पाइँदैन । राजनीतिक विश्लेषक डा. सुरेन्द्र केशीले यो रहस्यको गर्भमा रहेको घटनाको भित्रि पाटो गम्भीर रहेको संकेत गर्नुभयो ।

राजसंस्था पुनस्र्थापनाको माग गर्दै आएको राप्रपाले पनि यो हत्याकाण्डबारे खुुलेर बोलेको पाइँदैन । उनीहरुका लागि यो एजेण्डा राजनीतिक रोटी सेक्नका लागि मात्रै भएको छ । देशको मूल नेतृत्वनै ढलेर व्यवस्था परिवर्तनसम्म आइपुग्दा समेत हत्याकाण्ड रहस्यको गर्भमै रहनु बिडम्बना हो ।
००००