काठमाडौं । अहिलेको संसदीय व्यवस्थामा अंकगणितका आधारमा सरकार निर्माण हुने भएकोले राजनीतिक स्थायित्व देखिँदैन । सरकार अदलबदलको स्थिति समेत म्युजिकल चेयरको खेलजस्तै भएको छ । अहिलेकै १ वर्षको वरिपरि तीनपटक सरकार बन्ने र भत्किने स्थिति सिर्जना भयो जसले थितिलाई बिगारेको छ । हालका प्रधानमन्त्री पुष्पकमल दाहाल प्रचण्ड स्वयंपनि उथलपुथलको राजनीतिलाई प्रशय दिने गतिविधिमा तल्लीन देखिनुभएको छ । आफू रहुञ्जेल यो प्रक्रिया दोहोरिइरहने उहाँको दाबी छ । नियमित संसद्मा जाने तथा सांसदको रसस्वादन गरिसकेकाहरूलाई अहिलेको गतिविधिले दिक्क पार्ने गरेको छ । त्यहीँ भएर पनि जनतामा वितृष्ण बढिरहेको पाइन्छ । नेपाल किसान मजदुर पार्टीका सांसद प्रेम सुवालले संसद् अनिर्णयको बन्दी बन्दै भएको दाबी गर्नुभयो । न त कानून निर्माण हुन सकेको छ न सांसदहरूले उठाएका मुद्दाहरू कार्यान्वयनको बाटोमा गएका छन् ।
विश्वका अन्य मुलुकहरूमा पनि संसद्मा निकै विवाद हुने गरेको छ, त्यहाँ काम पनि सोही अनुसार भइरहेको हुन्छ । नेपालमा संसदीय अभ्यास कमजोर बन्दै गएको छ । प्रतिनिधिसभा सदस्यहरूले उठाएका कैयन प्रश्नहरू अनुत्तरित नै रहेका हुन्छन् । कानून बनाउने थलो संसद्मा संविधान जारी भएको ८ वर्षसम्म पनि उल्लेख्य प्रगति हुन सकेको छैन । एमाले सांसद मानवीर राईका अनुसार संसद्मा सत्ता र प्रतिपक्षको जुहारी सामान्य हुन्छ । उठेका विभिन्न प्रकरणहरूमा सफलता हात लागेको उहाँको भनाइ छ ।
संसद्लाई व्यवस्थित रुपमा सञ्चालन गर्न नसकिएको राजनीतिक विश्लेषकहरूको दाबी छ । विश्लेषक प्राडा गोविन्दमानसिंह कार्कीले अहिलेको संसद् सत्ता उलटपुलटमा मात्रै केन्द्रित रहेको बताउनुभयो । संविधानको मर्म अनुसार नियमित कारबाही हुन नसकेको उहाँको तर्क छ ।
संसद्को गतिरोध खोल्नका लागि दलहरू उदार हुन आवश्यक हुन्छ । विभिन्न बहानामा सत्ता प्राप्ति मात्रै लक्ष्य भएपछि यस्ता अन्यौलता र जटिलता आउने गर्दछन् । अहिलेसम्मको अभ्यासबाट पाठ सिक्दै नयाँ अध्यायको रूपरेखा आवश्यक देखिएको छ ।
