काठमाडौं । विधेयक अधिवेशनका रुपमा लिइने संघीय संसद्को हिउँदे अधिवेशन अन्त्य भएसँगै कांग्रेसले रोष प्रकट गरेको छ भने एमालेले बचाउ गरेको छ । बजेट अधिवेशनका लागि हिउँदे अधिवेशन अन्त्य आवश्यक रहेको एमालेका ठहर छ । कांग्रेसले भने बजेटका लागि पर्याप्त समय हुँदा पनि सरकार जवाफ दिनबाट भागेको आरोप लगाएको छ । संघीय संसद्को हिउँदे अधिवेशन २०८० साल माघ २२ गतेबाट सुरु भई आज राति १२ बजेदेखि सकिन सभामुख देवराज घिमिरेले जानकारी दिनुभयो । उहाँले संसद् सञ्चालन र कारबाहीमा केही सुधार भएपनि यो पर्याप्त नरहेको जिकिर गर्नुभयो ।
हिउँदे अधिवेशनमा करिब ७० दिनमा ३ वटा विधेयक मात्रै पारित भएका छन् । सभामुख घिमिरेले सो अधिवेशनमा भएको कामको आइतबार प्रतिनिधिसभा बैठकमा संक्षिप्त जानकारी गराउँदै सम्पत्ति शुद्धीकरण निवारण तथा व्यावसायिक वातावरण प्रवर्द्धनसम्बन्धी केही ऐनलाई संशोधन गर्न बनेको विधेयक, अनुगमन तथा मूल्याङ्कन विधेयक, २०७६ र खाद्य स्वच्छता तथा गुणस्तर विधेयक, २०७७ सभाबाट पारित भएको बताउनुभयो । पारित भएका विधेयकहरू सर्वसम्मत की बहुमत स्पष्ट नभएको सांसद प्रेम सुवालले बताएपछि सवाल जवाफ भएको थियो ।
संसद्मा ६ वटा विधेयकहरू सम्बन्धित समितिमा विचाराधीन रहेका छन् । त्यसैगरी संघीयता कार्यान्वयनका लागि महत्त्वपूर्ण मानिएको संघीय निजामती सेवा विधेयक, २०८० माथिको सामान्य छलफल सकिएपछि सो पारित हुन सकेको छैन । नेपाली कांग्रेसका प्रमुख सचेतक रमेश लेखकले भने सरकारले अधिवेशन अन्त्य गरेर अकर्मण्यता देखाएको आरोप लगाउनुभएको छ ।
एमाले अध्यक्ष एवं पूर्वप्रधामन्त्री केपी शर्मा ओलीले बजेट अधिवेशनको पूर्वसन्ध्यामा रहेकोले अधिवेशन सही समयमा अन्त्य गरिएको बताउनुभयो । कांग्रेसले सत्ता बाहिर रहनुको छटपटी देखाइरहेको उहाँको आरोप थियो ।
समग्रमा संसद्को हिउँदे अधिवेशन हेर्दा परिणाममुखी बन्न सकेन, कसलाई मन्त्री प्रधानमन्त्री बनाउने भन्नेतर्फ समय व्यतीत भएको थियो । सत्ताको माथ लागेपछि जनताका आवाज मुखरित हुने संसद् जहिले बन्धक प्रायः बन्यो । जनतालाई भने नयाँ पुराना सबैको परीक्षण गर्ने मौका मिलेको थियो ।
