काठमाडौं । नेपालको राजनीतिक इतिहासमा व्यवस्था परिवर्तन भएपनि जनताको अवस्थामा सुधार हुन नसक्दा जनतामा नैराश्यता छाउँदै गएको छ । जनतामा महत्वकांक्षा बढाइदिने तर काममा प्रगति नहुने गरेका कारण मुलुकको गति कहाँ पुगेर ठोकिन्छ त्यसै भन्न सकिने अवस्था छैन । राजनीतिक दलहरूमा नैतिकताको खडेरी आउँदा इमानदारिता हराउँदै गएको छ । राजनीतिक रटान र यर्थाथमा वास्तविकता फरक बन्दै गएको छ । जसका कारण दलभित्रै एकअर्का माथि आरोप प्रत्यारोपको श्रृंखला बढिरहेको पाइन्छ । केही समयअघि परिवर्तन भएको समीकरणका कारण मुलुकको ठूलो दल नेपाली कांग्रेस पुनः प्रतिपक्षमा पुगेको छ । आपसी कुण्ठा र द्वेषका कारण एकअर्कालाई चिढाउने कार्यले उग्र रूप लिँदै गएको छ । जनताका चित्र आँखा अगाडि स्पष्ट हेर्दा समस्या नै समस्या रहेको हुँदा रास्वपाले केही गर्ने हुटहुटीमा रहेको नेता शीव नेपालीको भनाइ छ । प्रश्न उठ्दै गर्दा त्यो कतिको ओजिलो छ त्यसमा भरपर्ने नेपालीको तर्क छ ।
पछिल्लो समय काम कम प्रचार बढी गर्ने प्रचलनको हाबी भएको छ । आफ्नै जिम्मामा आएको कामलाई समेत आलटाल गर्ने प्रवृत्ति र लोकप्रियताका नाममा स्टण्ट देखाउने जमातको कमी छैन । नेकपा एमालेका नेता एवं खानेपानी मन्त्री राजेन्द्र राईले पछिल्लो समय विकासले गति लिँदै गएको र यसमा थप मलजल गर्ने काम जिम्मेवारीमा भएकाहरूको रहने हुँदा परिणाममा प्रतिबद्ध हुनुपर्ने बताउनुभयो ।
नेपाली कांग्रेसले भने सरकारका कामकारबाही र जिम्मेवार पदमा बसेकाहरूलाई खबरदारी गरिरहेको छ । विभिन्न काण्डमा मुछिएकाहरू राज्यको महत्त्वपूर्ण जिम्मेवारीमा बसेको हुँदा यसले सुशासन नभई कुशासनको बाटोमा लैजाने नेता कांग्रेस प्रचार विभाग प्रमुख मीन विश्वकर्माको भनाइ छ ।
नेपालसँगै विकासको गति लिएका मुलुकहरू विश्व प्रतिस्पर्धामा रहेका बेला यहाँको अवस्था कमजोर बन्दै गएको छ । विदेशिने दर बढिरहेको छ भने जनताले समस्या झेलिरहेका छन् । मुलुक विकासका निम्ति एकसोचका साथ अगाडि बढ्न सके मात्रै विकास र समृद्धिको आभास गर्न सकिन्छ ।
