काठमाडौं। आगामी बैशाख १५मा हुने उपनिर्वाचनका लागी उमेदवारको टुँगो लगाउनु नेपाली कांग्रेसको कार्यसम्पादन समिति बैठक आज पनि बस्ने भएको छ।

यसअघि हिजो साँझ बसेको बैठकमा सभापति शेरबहादुर देउवा र शेखर–गगन पक्षबिच उम्मेदवार चयनमा विवाद भएपछि कुनै निर्णय नगरी बैठक आजका लागी सारिएको हो।

बैठकमा सभापति देउवाले इलाम–२ मा डम्बर खड्का र बझाङको प्रदेशसभा निर्वाचन क्षेत्र १ मा अभिषेक सिंहलाई उम्मेदवारका रूपमा प्रस्ताव गर्नुभएको थियो। सभापति देउवाको प्रस्तावमा नेता शेखर कोइराला र महामन्त्री गगन थापाले असहमति जनाएपछि उम्मेदवारको टुङ्गो लाग्न नसकेको हो।

इलाम—२ मा भेषराज आचार्य र बझाङमा जगत जोशी उम्मेदवार हुनुपर्ने नेता कोइराला र थापाको मत छ। महामन्त्री विश्वप्रकाश शर्मा र सहमहामन्त्री भीष्मराज आङदम्बेले गरेको इलाम—२ को अध्ययन रिपोर्टमा खड्कालाई उम्मेदवार बनाउन उपयुक्त हुने आशय थियो।

कांग्रेस प्रवक्ता प्रकाशशरण महतकाअनुसार आज दिउँसो २ बजे पुनः बैठक बसेर उम्मेदवारको टुङ्गो लगाउने र कार्यसम्पादन समिति बैठकको निर्णय अनुमोदन गर्न आजै अपराह्न ४ बजे संसदीय बोर्डको बैठक बस्नेछ।