काठमाडौं । सरकारले विदेशी च्यानलको क्लिन फिड (विज्ञापनरहित प्रसारण)को निर्णयबाट पछि हट्न नसक्ने भन्दै सम्पूर्ण विदेशी च्यानललाई क्लिन फिड च्यानल प्रसारण गर्न आग्रह गरेको छ ।

सरकारका प्रवक्ता एवं सञ्चार तथा सूचना प्रविधि मन्त्री पार्वत गुरुङले विज्ञापन नियमन गर्ने ऐन र नियमावलीअनुसार कात्तिक ८ गतेबाट क्लिन फिड लागू हुने व्यवस्था कार्यान्वयन हुने बताउनुुभएको छ ।

आज पत्रकार सम्मेलन गर्दै गुरुङले क्लिनफिड लागू गर्ने निर्णय ऐतिहासिक भएको भन्दै सरकार यसबाटपछि नहट्ने बताउनुुभएको हो । सरकारले ऐन र नियमावलीको भावनाअनुसार यो व्यवस्था कार्यान्वयन गर्न लागेको उहाँको भनाई छ ।

विज्ञापन ऐनअनुसार ऐन प्रमाणीकरण भएको एक वर्षभित्र क्लिनफिड लागू हुनुपर्छ । राष्ट्रपति विद्यादेवी भण्डारीले गत वर्ष कात्तिक ७ गते ऐन प्रमाणीकरण गर्नुभएको थियो ।