काठमाडौं। सुन तस्करी प्रकरणबारे छानबिन समितिले केन्द्रीय अनुसन्धान ब्यूरो (सीआईबी)का प्रमुख एआईजी किरण बज्राचार्य र अनुसन्धान अधिकृत डीएसपी दुर्गाराज दाहालसँग सोधपुछ गरेको छ।

६१ किलो सुन तस्करी प्रकरणमा मुछिएका एक आरोपी प्रहरी कार्यालयमा पुगेर पनि छुटेको सन्दर्भमा बज्राचार्यसँग सोधपुछ गरेको समितिका एक सदस्यले जानकारी दिनुभयो। त्यसक्रममा बज्राचार्यले ‘त्यो विषयमा’ आफूलाई थाहा नभएको जवाफ दिएका छन्।

यस्तै समितिले ‘भेपमा लुकाएर तस्करी भएको ९ किलो सुनको सन्दर्भमा सुन प्रकरणको अनुसन्धान अधिकृत डीएसपी दाहालसँग पनि सोधपुछ गरेको हो। उनिसँग पछिल्लो सुन प्रकरणबारे पनि कुरा भएको छ।

समिति स्रोतका अनुसार यसअघी सहसचिव झलकराम अधिकारीको पनि बयान लिइएको छ। सुन तस्करी प्रकरणमा जोडिएका दावा छिरिङसँग भएको संवादको विषयलाई लिएर उनीसँग सोधपुछ भएको हो।

अध्यागमन विभागमा महानिर्देशक रहेका बेला दावासँग उनको कुराकानी भएको विवरण सार्वजनिक भएका बेला मन्त्रालयले उनको जिम्मेवारी खोसेको थियो ।

सरकारले सुन तस्करीबारे छानबिन गर्न उच्च अदालतका पूर्वन्यायाधीश डिल्लीराज आचार्यको नेतृत्वमा छानबिन समिति बनाएको थियो।

तीन महिनाको समय सीमा सकिएपछि फेरि थप भएको अवधिमा आयोगले सुन प्रकरणसँग सम्बन्धित अन्य व्यक्तिहरुसँग बयान लिइरहेको छ ।