काठमाडौं । सत्तारुढ गठबन्धन दलभित्र मतभेद शुरु भएको टिप्पणी हुन थालेको छ । राष्ट्रियसभा निर्वाचनको पूर्वसन्ध्यामा सिट बाँडफाँटमा तालमेल नमिल्दा केही असन्तुष्टि चुलिएको सत्तासाझेदार दलकै नेताहरू बताउने गरेका छन् । विशेष गरी नेकपा एकीकृत समाजवादीले राष्ट्रियसभामा पाएको दुई सिटमा चित्त दुखाएको छ । पार्टीका सम्मानित नेता झलनाथ खनालले यो गठबन्धनबाट बाहिरिनुपर्ने आवाज उठाउनुभएको छ । तर, अन्य नेताहरू भने तत्कालै यो निर्णय लिन नहुने पक्षमा लागेका छन् । पार्टीका प्रवक्ता एवं उपमहासचिव जगन्नाथ खतिवडाले महाधिवेशनपछि मात्रै सरकारका विषयमा सोच्न सकिने बताउनुभएको छ । असन्तुष्टिका बीच पनि केही समय हेर र पर्खको अवस्था रहेको उहाँको भनाइ छ ।
सत्तासाझेदार दलभित्रको ठूलो पार्टी नेपाली कांग्रेसलाई पनि गठबन्धन टिकाउनुपर्ने बाध्यताका बीच चुनौती थपिँदै गएको छ । पार्टीबाट सरकारमा पठाएका मन्त्रीहरूले राम्रो डेलिभरी दिन नसकेको विषयमा समेत विवाद छ । कांग्रेस नेता रामहरि खतिवडाले हालको गठबन्धनभित्रका दलहरूले चित्त दुखाउनुपर्ने अवस्था नरहेको बताउनुभयो ।
नेकपा एमालेले गठबन्धनलाई जसरी भएपनि भत्काउने रणनीति अख्तियार गरेको छ । राष्ट्रियसभा निर्वाचनमै एमालेलाई मिलाएर लैजाने प्रधानमन्त्री पुष्पकमल दाहाल प्रचण्डको प्रस्ताव अन्ततः फेल भएको थियो । अहिलेपनि प्रधानमन्त्री प्रचण्ड शक्ति सन्तुलनका निम्ति विभिन्न कसरत गरिरहनुभएको छ । माओवादी केन्द्रका सचिव गणेश शाहका अनुसार संविधानले निर्दिष्ट गरेको परिकल्पनाका आधारमा गठबन्धन आवश्यक छ । हालका प्रधानमन्त्री प्रचण्डले सबै दललाई मिलाएर लैजाने कौशलता राखेको उहाँको दाबी छ ।
अहिलेको व्यवस्थाले एकै दलको बहुमत आएर सरकार बन्ने सम्भावना कम देखिन्छ । नेपालमा विद्यामान विभिन्न दल र स्वतन्त्रबाट निर्वाचन जितेर आएका सांसदहरूलाई समेत समेटेर सरकार निर्माण गर्नुपर्ने बाध्यता रहेको छ । अहिलेको अवस्थामा सबै दलहरू मिलेर मुलुकलाई निकास दिन आवश्यक देखिन्छ । राजनीतिक रोटी सेक्नका लागि गरिने प्रोपोगाण्डा भन्दापनि विकास र समृद्धिको नारालाई व्यवहारमा उर्तान जरुरी छ ।
