काठमाडौं । प्रमुख प्रतिपक्षी दल नेपाली काँग्रेसले आफ्ना सांसदले पाएको दसैं भत्ता फिर्ता गर्ने भएको छ । पार्टीका शीर्ष नेताको टेलिफोन संवादपछि सांसदहरु दसैं भत्ता फिर्ता गर्ने निष्कर्षमा पुगेको काँग्रेस संसदीय दलका प्रमुख सचेतक बालकृष्ण खाणले जानकारी निुभयो ।

त्यसका लागि संसदीय दलले केही समयमै दसैं भत्ता फिर्ता गर्ने औपचारिक निर्णयसहितको विज्ञप्ति निकाल्ने बताउनुभयो । खाणले संसदीय दलका नेतासमेत रहेका पार्टी सभापति शेरबहादुर देउवाले सांसदको दसैंभत्ता फिर्ताका लागि निर्देशन पनि दिनुभएको थियो ।

दसैंभत्ता फिर्ताका लागि संघीय संसद् सचिवालयलाई पत्र पठाउने तयारी भइरहेको खाणले जानकारी दिनुभयो । दसैं भत्ताको चौतर्फी विरोध भएपछि प्रमुख सचेतक खाण, सांसदहरु प्रकाशमान सिंह र गगन थापाले दसैंभत्ता फिर्ताको घोषणा गरेका थिए ।

संसदीय दलले निर्णय गरेर सबैको भत्ता फिर्ता गर्नपर्ने सांसदहरुबाट नै आवाज उठेपछि संसदीयले संस्थागत निर्णय गर्न लागेको हो ।

संस्थागत रूपमै फिर्ता गर्ने नेकपाको पनि तयारी

सत्तारुढ नेकपा संसदीय दलले पनि संस्थागत निर्णय गरेरै सांसदहरूको दशैं भत्ता फिर्ताको तयारी गरेको छ । राष्ट्रिय सभामा नेकपा संसदीय दलका प्रमुख सचेतक खिमलाल भट्टराईले संस्थागत रूपमै निर्णय गरेर भत्ता फिर्ताको तयारी भइरहेको जानकारी दिनुभयो ।

सांसदहरूले दशैं भत्ता बुझेकोबारे मिडिया सामाजिक संजालमा चर्को आलोचना भएपछ हिजो केही सांसदले भत्ता फिर्ता गरिसकेका छन् । जनता समाजवादी पार्टीका सांसदहरूले पनि भत्ता फिर्ताबारे छलफल शुरू गरेका छन् ।