काठमाडौं । भारतीय विदेशमन्त्री एस.जयशंकरको दुई दिने नेपाल भ्रमण सकिएको छ । उहाँको यो भ्रमणका क्रममा भएको सम्झौतालाई केहीले ठुलो उपलब्धिका रुपमा लिएका छन् भने कतिपयले हात्तीको देखाउने र चपाउने दाँत फरकभएजस्तै गरी टिप्पणी गरेका छन् । भ्रमणका क्रममा कुनै राजनीतिक सन्धिसम्झौतामा छलफल नभएपनि विकास निर्माण, आर्थिक समृद्धिलगायतका विषयमा महत्त्वपूर्ण निर्णय भएको सरकार पक्षको दाबी छ । उच्च प्रभाव सामुदायिक विकास परियोजना कार्यान्वयनका लागि बजेटको सीमा पाँच करोडबाट बढाएर २० करोड रुपैयाँ पुर्याइएको छ । यो सम्झौतामा प्रमुख प्रतिपक्षी दल नेकपा एमालेले आपत्ति जनाएको छ । नेकपा एमालेका सांसद रघुजी पन्तले यस सम्झौताले अनावश्यक र अवाञ्छित राजनीतिक प्रभाव, दबाब र हस्तक्षेपलाई निम्त्याउने दाबी गर्नुभयो ।
३ करोड ५ करोड हुँदै भारतीय दूतावासले नेपालमा सीधै २० करोड लगानी गर्न पाउने विषय सत्य रहेको बताउँदै प्रधानमन्त्री पुष्पकमल दाहाल प्रचण्डले त्यसको आफ्नै प्रक्रिया रहेको स्पष्ट पार्नुभयो । यद्यपि एमालेले उठाएको कुरामा ध्यानाकर्षण भएको उहाँको भनाइ थियो ।
परराष्ट्रविद् हेमराज कार्कीले भारतले नेपालको पानीमाथि नजर लगाएको बताउँदै अबको केही वर्षमै त्यहाँ पानीको हाहाकार हुने दाबी गर्नुभयो । तत्कालीन समयमा नेपालको संसद्मा भारतीय प्रधानमन्त्री नरेन्द्र मोदीले पनि नेपालको पानी र जवानी आफूहरूलाई आवश्यक रहेको बताएका थिए ।
राजनीतिक विश्लेषक भेषराज घिमिरे र डा. विष्णु दाहालले एस जयशंकरको भ्रमण शंकास्पद रहेको टिप्पणी गरेका छन् । विश्लेषक घिमिरेका अनुसार राष्ट्रिय स्वार्थ र हितका विषयमा चुईक्क बोल्न नसक्नु कमजोरी हो । डा. दाहालले पनि नेपालको विद्युत् बिक्रीका क्रममा भारत कानमा तेल हालेर बसेको दृष्टान्त पेश गर्नुभएको छ ।
छिमेकी दुई ठूला मुलुक चीन र भारतले विश्व प्रतिस्पर्धा गरिरहेका बेला बीचको देशमा चरम गरिबी हुनु लज्जाको विषय हो । दुई देशसँग सुमधुर सम्बन्ध स्थापना गरी समृद्ध बन्ने बाटोमा जान खोजेको पनि देखिँदैन । मुलुकको राजनीतिक अस्थिरताकै कारण भ्रष्टाचारले सीमा नाघेको छ । यहीँ अवस्था कायम रहने हो भने राष्ट्रिय रूपमै खतरा आउने देखिन्छ ।
